کراچی: کے الیکٹرک کا لائسنس منسوخ کرنے کی قرارداد سندھ اسمبلی میں پیش کردی گئی۔

کے الیکٹرک کا لائسنس منسوخ کرنے کی قرارداد سندھ اسمبلی میں پیش کردی گئی ہے، قرارداد آزاد پارلیمانی رکن سجاد سومرو نے پیش کی جب کہ وزیر پارلیمانی امور ضیاء الحسن لنجار نے قرارداد کی حمایت کردی ہے۔

وزیر پارلیمانی امور ضیاء الحسن لنجار کا کہنا ہے کہ کے الیکٹرک سےعوام بہت پریشان ہے، کے الیکٹرک نےعوام کی شکایات کا ازالہ نہیں کیا۔

وزیر پارلیمانی امور نے کہا کہ کے الیکٹرک کی زیادتیوں کے خلاف اسمبلی کمیٹی کا اجلاس ہونا چاہیے۔

سندھ اسمبلی میں اپوزیشن لیڈر علی خورشیدی کا کہنا تھا کہ کے الیکٹرک سے متعلق اسمبلی کی کمیٹی کا اجلاس جلد بلایا جائے۔

دوسری جانب غلام قادر چانڈیو نے کہا کہ کے الیکٹرک کا سربراہ کمیٹی کا فیصلہ قبول نہ کرے تو کارروائی ہوگی۔

کے الیکٹرک سے متعلق قرارداد پر سندھ اسمبلی کے 11 ارکان پر مشتمل کمیٹی تشکیل دے دی گئی ہے۔

کمیٙٹی کے الیکٹرک حیسکو اور سیپکو کی کارکردگی کا جائزہ لے گی جب کہ کمیٹی میں پیپلز پارٹی، ایم کیو ایم اور پی ٹی آئی کے اراکین شامل ہیں۔