راولپنڈی: سیکیورٹی فورسز نے خوارج سے جھڑپوں کے دوران 12 خارجی دہشت گردوں کو جہنم واصل کردیا گیا۔

پاک فوج کے شعبہ تعلقات عامہ (آئی ایس پی آر) کے مطابق 19 اور 20 ستمبر کی شب شمالی اور جنوبی وزیرستان میں سیکیورٹی فورسز سے خوارج کی جھڑپیں ہوئی جب کہ سیکیورٹی فورسز کے ساتھ دو جھڑپوں میں 12 خوارج کو جہنم واصل کردیا گیا۔

آئی ایس پی آر نے بتایا کہ 19 ستمبر کو پاک افغان بین الاقوامی سرحد پر 7 دہشت گردوں نے در اندازی کی کوشش کی، در اندازی کی کوشش کا پتا چلنے پر سیکیورٹی فورسز نے شمالی وزیرستان کے علاقے اسپن وام میں کارروائی کی۔

ترجمان پاک فوج نے کہا کہ افغانستان سے آنے والے در اندازوں کو سیکیورٹی فورسز نے مکمل طور پر گھیرے میں لے لیا جس کے بعد سیکیورٹی فورسز اور دہشت گردوں کے درمیان شدید فائرنگ کا تبادلہ ہوا۔

آئی ایس پی آر کا کہنا تھا کہ اس دوران سیکیورٹی فورسز نے تمام 7 دہشت گردوں کو جہنم واصل کردیا، افغانستان سے انے والے دہشت گردوں کے قبضے سے بڑی مقدار میں اسلحہ اور بارودی مواد برآمد ہوا ہے۔

ترجمان پاک فوج نے مزید بتایا کہ دہشت گردوں کے خلاف دوسری کارروائی جنوبی وزیرستان کے علاقے لدھا میں کی گئی، لدھا میں دہشت گردوں نے سیکیورٹی فورسز کی چیک پوسٹ پر حملہ کیا جب کہ سیکیورٹی فورسز نے چیک پوسٹ پر حملہ ناکام بناتے ہوئے 5 خارجی دہشت گردوں کو ہلاک کردیا۔

آئی ایس پی آر نے کہا کہ چیک پوسٹ پر حملے کے دوران شدید فائرنگ کے تبادلے میں دھرتی کے 6 بہادر بیٹے بھی شہید ہوگئے اور دہشت گردوں کے خلاف بے جگری سے لڑنے والے اہلکاروں نے جان کا عظیم نذرانہ پیش کرتے ہوئے جام شہادت نوش کیا۔

پاک فوج کے شعبہ تعلقات عامہ کا کہنا تھا کہ اسپن وام اور لدھا میں دہشت گردوں کا مکمل خاتمہ یقینی بنانے کے لیے سینیٹائزیشن آپریشن جاری ہے۔

آئی ایس پی آر نے مزید کہا کہ پاکستان کی سیکیورٹی فورسز وطن عزیز سے دہشت گردی کی لعنت کے خاتمے کے لئے پرعزم ہیں، بہادر سپاہیوں کی عظیم قربانیاں دہشت گردی کے خلاف عزم کو مزید تقویت دیتی ہیں۔