اسلام آباد: صدر مملکت آصف علی زرداری کا کہنا ہے کہ پاکستان سمندری ماحولیاتی نظام کے تحفظ کے لیے پرعزم ہے۔

صدر آصف علی زرداری سے انٹرنیشنل میری ٹائم آرگنائزیشن (آئی ایم او) کے سیکرٹری جنرل کی ملاقات ہوئی، صدر مملکت نے سمندری ماحولیاتی نظام اور ساحلی علاقوں کے تحفظ کے عزم کا اعادہ کیا۔

آصف علی زرداری نے کہا کہ پاکستان سمندری آلودگی اور موسمیاتی تبدیلی جیسے چیلنجز سے نمٹنے کے لئے پرعزم ہے، سمندری آلودگی پاکستان کے لیے باعثِ تشویش امر ہے جب کہ سمندری آلودگی سے آبی حیات متاثر ہورہی ہیں۔

صدر مملکت کا کہنا تھا کہ سمندری آلودگی سے ماہی گیری کے شعبے کی نمو میں کمی ہورہی ہے،  بلیو اکانومی پر توجہ دینا پاکستان کی ترقیاتی حکمت عملی کا اہم جزو ہے۔ پاکستان ماہی گیری اور شپ بریکنگ کے شعبوں کو جدید بنانے کا خواہاں ہے۔

انہوں نے کہا کہ پاکستان موسمیاتی تبدیلی کے اثرات سے نمٹنے کے لئے مؤثر اقدامات کررہا ہے جب کہ پاکستان سمندری ماحولیاتی نظام کی بہتری کے لئے آئی ایم او کی معاونت کا خیرمقدم کرے گا۔

صدر مملکت کہتے ہیں کہ پاکستان نے 10 لاکھ سے زائد ایکڑ پر مینگرووز لگائے، عالمی مارکیٹ میں کاربن کریڈٹ فروخت کیے جب کہ مزید 20 لاکھ ایکڑ اراضی پر مینگرووز لگانے کے منصوبے جاری ہیں۔

آصف زرداری نے آئی ایم او کے ضوابط اور معیارات پر عمل کرنے کے عزم کا اعادہ کرتے ہوئے مزید کہا کہ پاکستان آئی ایم او کے ساتھ مختلف شعبوں میں تعاون کا خواہاں ہے۔

آئی ایم او کے سیکرٹری جنرل نے کہا کہ پاکستان کے بحری شعبے میں بڑی صلاحیت موجود ہے،  آئی ایم او پائیدار اور مؤثر بحری انڈسٹری کے فروغ میں پاکستان کی حمایت جاری رکھے گا۔

علاوہ ازیں صدر مملکت نے مؤثر ریگولیٹری فریم ورک کا مشن آگے بڑھانے کے لئے سیکرٹری جنرل کی قیادت پر اعتماد کا اظہار کیا۔