کوئٹہ: کچلاک دھماکے میں شہید ہونے والے پولیس اہلکاروں کی نماز جنازہ ادا کردی گئی۔

کچلاک دھماکے میں شہید ہونے والے پولیس اہلکاروں کی نماز جنازہ پولیس لائن میں ادا کردی گئی ہے جب کہ نماز جنازہ میں آئی جی بلوچستان پولیس سمیت دیگر اعلیٰ حکام نے شرکت کی۔

یاد رہے کہ کچلاک میں بوستان روڈ پر پولیس موبائل کے قریب ہونے والے دھماکے میں 2 پولیس اہلکار موقع پر ہی شہید ہوگئے تھے۔

پولیس ذرائع  نے بتایا تھا کہ شہید اہلکاروں کے علاوہ اب تک کوئی زخمی سامنے نہیں آیا ہے جب کہ سیکیورٹی فورسز نے علاقے کو گھیرے میں لے کر واقعے کی تحقیقات شروع کردی ہیں۔

دوسری جانب وزیر اعظم شہباز شریف اور وزیر داخلہ محسن نقوی نے کچلاک میں دہشگردانہ حملے کی مذمت کرتے ہوئے شہید پولیس اہلکاروں کو خراج عقیدت پیش کیا اور اہلکاروں کے لئے دعائے مغفرت سمیت لواحقین کے لیے صبر و استقامت کی دعا کی۔

وزیراعظم محمد شہباز شریف کا کہنا ہے کہ دہشت گردی کے مکمل خاتمے تک دہشت گردوں کے خلاف ہماری جنگ جاری رہے گی۔

انہوں نے کہا تھا کہ واقعے کے ذمہ دار دہشت گردوں کو جلد از جلد قرار واقعی سزائیں دی جائیں، پوری قوم دہشت گردی کے خلاف سیسہ پلائی دیوار کی طرح ہماری سیکیورٹی فورسز کے جوانوں کے شانہ بہ شانہ کھڑی ہے۔

وزیر داخلہ محسن نقوی کہتے ہیں کہ دہشت گردی سے نمٹنے کے لئے قوم کے غیرمتزل عزم کو شکست نہیں دی جا سکتی، یہ  جنگ پوری قوم کی جنگ ہے اور قوم کی حمایت سے آخری دہشت گرد و سہولت کار کے خاتمے تک جاری رہے گی۔

ان کا مزید کہنا تھا کہ شہید اہلکاروں زین اللہ اور طاہر کی قربانی کو سلام پیش کرتے ہیں، بلوچستان پولیس نے دہشت گردی کے خلاف جنگ میں لازوال قربانیاں دی ہیں۔