وزیر اعلیٰ پنجاب مریم نوازشریف نے کہا کہ اطالوی سرمایہ کار پنجاب آئیں، ہر ممکن سہولت دیں گے۔

وزیر اعلیٰ پنجاب مریم نوازشریف سے اٹلی کی سفیرماریلنا ارمیلن نے ملاقات کی۔

ملاقات میں اٹلی نے چکوال میں زیتون کی کاشت مزید بڑھا نے کی پیش کش کی اور پنجاب میں لائیو اسٹاک اور ڈیر ی پراجیکٹ میں اٹالین انویسٹمنٹ پر اتفاق کیا گیا، اس کے علاوہ اطالوی سفیر نے پنجاب میں عوامی فلاحی پراجیکٹس کو متاثر کن قرار دیا۔

ملاقات کے دوران دونوں رہنماؤں نے سیاحت، ٹیکسٹائل، لیدر، ماربل، کارپٹس اور دیگر شعبوں میں تعاون کے فروغ پر تبادلہ خیال کیا، جبکہ تجارتی اور ثقافتی وفود کے تبادلوں کے حوالے سے اقدامات پر بھی بات چیت ہوئی۔

مریم نواز نے کہا کہ پاکستان اور اٹلی کے باہمی ربط کو سود مند معاشی تعلقات میں تبدیل کیا جائے گا، جبکہ پنجاب حکومت اٹلی کے ساتھ  مختلف شعبوں میں مزید اشتراک کار بڑھانا چاہتی ہے۔

وزیر اعلیٰ پنجاب نے کہا کہ تجارت بڑھانے کے لیے ورک ویزا میں آسانی اور ٹریڈ کمیشن کا فعال کردار کلیدی اہمیت رکھتا ہے۔

دوسری جانب اٹلی کی سفیرماریلنا ارمیلن لاہوریوں کی زندہ دلی اور میزبانی کی معترف، کہا کہ پاکستان خاص طور پر لاہور آنا بہت اچھا لگا، منفی امیج کے جھوٹے پروپیگنڈے کے بالکل برعکس پاکستان شاندار ملک ہے۔

 اطالوی سفیر نے یہ بھی کہا کہ باہمی تجارت بڑھانے کے لیے ٹریڈ کمیشن نے کام کا آغاز کر دیا ہے، ورک ویزا میں آسانی لانے کے لیے اقدامات کررہے ہیں، ثقافت، سیاحت اور تجارت کے شعبوں میں تعاون کو مزید فروغ دیا جائے گا۔