گورنر خیبرپختونخوا فیصل کریم کنڈی نے کہا کہ ان لوگوں کو صوبے کی فکر نہیں، جلسوں کی فکر ہے۔

گورنر خیبرپختونخوا فیصل کریم کنڈی نے میڈیا سے گفتگو کرتے ہوئے کہا کہ میں نے ٹی وی پر دیکھا کہ کے پی حکومت ائیرلائن لینا چاہتی ہے، معلوم نہیں صوبائی حکومت کا یہ کونسا سیاسی کھیل ہے، اس وقت جامعات کو پیسوں کو ضرورت ہے یہ پیسے وہاں لگائے، اگر ان کے پاس کوئی اور طریقہ کار ہے تو ٹھیک ہے خرید لے۔

انہوں نے یہ بھی کہا کہ بشری بی بی غالباً پشاور سیاست کی غرض سے آرہی ہے، میں اگر لاہور، کراچی جاتا ہوں تو صوبے کی حقوق کے لیے جاتا ہوں،  اگر ان کو تکلیف ہے کہ ان کو کوئی نہیں بلاتا تو میں ان کی مدد کروں گا، یہ لوگ جو بھگت رہے ہیں یہ ان کا اپنا کردارہے۔

  گورنر خیبر پختونخوا نے میڈیا سے گفتگو کرتے ہوئے یہ بھی کہا کہ آج میں نے جو خط لکھا ہے یہ صوبائی حکومت کا کام ہے،  مجھے پتا ہےکہ یہ لوگ اس حوالے سے سیریس نہیں اس لیے خود وزیراعظم کو خط لکھا، پچھلی حکومت میں کون لوگ دہشتگردوں کو یہاں لائے، آج تک صوبائی حکومت کا ایک بندہ پاڑا چنار نہیں گیا۔

انہوں نے کہا کہ کیا ہماری صوبائی حکومت نے وفاق سے سپورٹ مانگی ہے، اگر انہوں نے سپورٹ مانگی ہو اور وفاق نے نہ دی ہو تو میں ان کے ساتھ ہوں۔

گورنر خیبر پختونخوا نے کہا کہ صوبائی حکومت سوئی ہوئی ہے یا وفاق اور صوبے کو لڑا رہی ہوتی ہے، وزیر اعلیٰ کے اپنے ضلع کے حالات کسی دے ڈھکے چھپے نہیں، جب وزیراعلیٰ نہیں تھے تو میں نے کہا تھا کہ خود ساختہ روپوشی ہے اور وہی ہوا۔