پاکستان پیپلز پارٹی کے چیئرمین بلاول بھٹو نے کہا کہ شاعرِ مشرق کی سوچ آج بھی ہمارے ملک کے لیے مشعلِ راہ ہے۔

چیئرمین بلاول بھٹو زرداری نے شاعر مشرق و عظیم فلسفی علامہ محمد اقبال کو ان کی 147 ویں سالگرہ پر خراج عقیدت پیش کرتے ہوئے کہا کہ علامہ اقبال کی فکری اور نظریاتی رہنمائی نے برصغیر کے مسلمانوں کو شعور اور بیداری بخشی، علامہ اقبال نے ایک ایسے معاشرے کا خواب دیکھا تھا جہاں انصاف، مساوات اور اتحاد بنیادی اقدار ہوں۔

ان کا یہ بھی کہنا تھا کہ علامہ اقبال کا وژن نہ صرف ایک علیحدہ وطن کے لیے تھا بلکہ ایک بہتر معاشرے کے قیام کے لیے بھی تھا، ایک ایسا معاشرہ جو ہمدردی، بہادری اور ترقی کا حامل ہو۔

 بلاول بھٹو نے یوم اقبال پر پیغام دیتے ہوئے یہ بھی کہا کہ اقبال کے افکار، خاص طور پر نوجوانوں کے لیے، خود انحصاری، استقامت، اور اقدار کی پاسداری کا درس دیتے ہیں، علامہ اقبال کے افکار  آج بھی لاکھوں پاکستانیوں کو متاثر کرتے ہیں۔

انہوں نے کہا کہ پاکستان کے عوام، خصوصاً نوجوان، اقبال کی شاعری اور فلسفے سے سبق حاصل کریں، نوجوان فکرِ اقبال کی روشنی میں چیلنجز کا مقابلہ کرنے اور ایک خوشحال، متحد اور جمہوری پاکستان کی تشکیل میں کردار ادا کریں۔

 بلاول بھٹو زرداری نے مزید یہ بھی کہا کہ سماجی انصاف، جمہوریت اور مساوی حقوق کی اقدار سے وابستگی کے عزم اعادہ کرتے ہیں، پیپلز پارٹی کی سماجی انصاف، جمہوریت اور مساوی حقوق کی اقدار اقبال کے نظریات کے عین مطابق ہیں۔

ان کا یہ بھی کہنا تھا کہ قوم اقبال کی میراث کو محض الفاظ میں نہیں بلکہ عمل کے ذریعے زندہ رکھیں، قوم ایک ایسے معاشرے کو فروغ دیں جس کی بنیاد رواداری، دیانتداری اور ترقی پر ہو۔

 بلاول بھٹو زرداری نے کہا کہ آئیے ہم اقبال کے خواب کو اپنی ذاتی اور اجتماعی زندگیوں میں اپنا کر آگے بڑھائیں، آئیے ایک ایسا پاکستان بنائیں جو اقبال  کے تصور کردہ انصاف، امن اور مساوات کے اصولوں کی عکاسی کرتا ہو۔