لاہور: وفاقی وزیرداخلہ محسن نقوی نے اسلام آباد میں تعمیر ہونے والی نئی سٹرکوں کے نام شہداء سے منسوب کرنے کا اعلان کردیا ہے۔

وزیر داخلہ محسن نقوی گلبرگ میں مسلم لیگ قائد اعظم کے سربراہ چوہدری شجاعت حسین کی رہائش گاہپر پہنچے جہاں انہوں نے چوہدری شجاعت سے ملاقات کی۔

ملاقات میں چوہدری شجاعت حسین نے کوئٹہ ریلوے اسٹیشن دھماکے کی شدید مذمت کی اور شہداء سے اظہار یکجہتی کیا اور اس دوران محسن نقوی اور شجاعت حسین نے شہداء کے خاندانوں سے دلی ہمدردی و تعزیت کا بھی اظہار کیا۔

دوران ملاقات چوہدری شجاعت نے وفاقی حکومت سے تعمیر ہونے والی تمام نئی سٹرکوں کو شہداء کے نام سے منسوب کرنے کا مطالبہ کیا۔

وزیر داخلہ محسن نقوی نے اسلام آباد میں تعمیر ہونے والی نئی سٹرکوں کے نام شہداء سے منسوب کرنے کا اعلان کردیا اور کہا کہ دیگر صوبوں کے وزراء اعلیٰ سے اس پر عمل درآمد کے  لئے بات کی جائے گی۔

ملاقات میں چوہدری شجاعت حسین نے گفتگو کرتے ہوئے کہا کہ یہ کام  شہدائے وطن اور ان کے خاندانوں کے ساتھ حکومت کے اظہار یکجہتی  کے حوالے سے ہمیشہ یاد رکھا جائے گا، دہشتگردی کے خلاف جنگ میں پاکستان کی قربانیوں کی نظیر اقوام عالم میں نہیں ملتی۔

انہوں نے کہا کہ دہشتگردی کے خلاف جنگ میں ہزاروں پاکستانیوں نے جام شہادت نوش کیا، یہ انمٹ قربانیوں ناقابل فراموش ہیں۔

دوسری جانب محسن نقوی کا کہنا تھا کہ پاکستان شہداء کی عظیم قربانیوں کا قرض ادا نہیں کر سکتا، شہداء نے اپنے قیمتی لہو سے امن کی آبیاری کی ہے۔

وزیر داخلہ محسن نقوی نے مزید کہا کہ شہداء کے خاندانوں کے ساتھ ہیں اور ہمیشہ ساتھ کھڑے رہیں گے، دھماکے بہادر پاکستانی قوم کا مقدر نہیں، قوم کی حمایت سے اس ناسور کا خاتمہ کریں گے۔

چوہدری شجاعت حسین اور چوہدری شافع حسین نے آسٹریلیا کے خلاف 22 برس ون ڈے سیریز جیتنے پر محسن نقوی کو مبارکباد دی اور کہا کہ آپ کی محنت اور کھلاڑیوں کی کارکردگی نے جیت میں اہم کردار ادا کیا۔

چوہدری شجاعت کا کہنا تھا کہ کرکٹ ٹیم اور قوم کو ایسی شاندار فتح کا بہت عرصے سے انتظار تھا، امید ہے کہ آئی سی سی چیمپئنز ٹرافی ٹورنامنٹ میں بھی پاکستانی ٹیم ایسی کارکردگی کا مظاہرہ کرے گی۔

واضح رہے کہ صوبائی وزیر شافع حسین بھی اس موقع پر موجود تھے۔