امیر جماعت اسلامی حافظ نعیم الرحمن نے کہا ہے کہ آزادی فلسطین کی جدوجہد میں ہم فلسطینی عوام کے ساتھ کھڑے ہیں۔

امیر جماعت اسلامی حافظ نعیم الرحمن نے اسلام آباد میں فلسطینی سفارت خانہ میں فلسطین کے سفیر جناب ڈاکٹر زہیر زید سے ملاقات ہوئی۔

حافظ نعیم الرحمن نے پاکستان میں تعیناتی پر نئے فلسطینی سفیر کو خوش آمدید کہا۔

انہوں نے کہا کہ آزادی فلسطین کی جدوجہد میں ہم فلسطینی عوام کے شانہ بشانہ کھڑے ہیں، فلسطین کے حوالے سے ہماری وہی پالیسی ہے جو قائد اعظم محمد علی جناح کی پالیسی تھی۔

ان کا کہنا تھا کہ بیت المقدس کی آزادی ہر مسلمان کے ایمان کا حصہ ہے، جماعت اسلامی کا ہر کارکن القدس کی آزادی کا نقیب ہے۔

حافظ نعیم الرحمن نے کہا کہ مسئلہ فلسطین پر پوری پاکستانی قوم متحد اور یک آواز ہے، الخدمت فاؤنڈیشن غزہ کے عوام کی امداد کے لیے اپنی سرگرمیاں جاری رکھے گی۔

فلسطینی سفیر ڈاکٹر زہیر زید نے اس موقع پر کہا کہ پاکستان کے عوام اور جماعت اسلامی پاکستان کی کاوشوں کو خراجِ تحسین پیش کرتے ہیں، فلسطینی پاکستان کو اپنا دوسرا گھر سمجھتے ہیں۔

ڈاکٹر زہیر زید کا مزید کہنا تھا کہ صہیونی نظریات سے پورے خطے کے امن کو خطرات لاحق ہیں، ہم اسلامی ممالک کی حکومتوں کا شکریہ ادا کرتے ہیں، مزید عملی اقدمات کی ضرورت ہے۔

ملاقات میں جماعت اسلامی کے ڈائریکٹر امور خارجہ آصف لقمان قاضی بھی موجود تھے۔