رہنما مسلم لیگ ن طلال چوہدری کا کہنا ہے کہ وزیراعلیٰ کےپی ہاؤس بھگوڑا ہاؤس بنا ہوا ہے۔

 رہنما مسلم لیگ ن طلال چوہدری نے میڈیا سے گفتگو کرتے ہوئے کہا ہے کہ اسلام آباد پر چڑھائی کے بعد پی ٹی آئی کو ناکامی ہوئی، پی ٹی آئی لاشوں کا جھوٹا بیانیہ بنا رہی ہے، پی ٹی آئی والے ناکامی کے بعد بزدلی سے بھاگے۔

انہوں نے کہا کہ پی ٹی آئی والے ناکامی، بزدلی چھپانے کے لیے گولیوں، لاشوں کا بیانیہ بنا رہے ہیں، وزیراعلیٰ کےپی ہاؤس بھگوڑا ہاؤس بنا ہوا ہے، وہ کون سی گولیاں تھیں جو کسی ایم این اے، ایم پی اے کو نہیں لگیں؟ کرم ایجنسی میں سیکڑوں جانیں گئیں، پی ٹی آئی کو فکر نہیں، ریاست کے صبر کو نہ آزمائیں۔

طلال چوہدری نے کہا کہ جس کی ویڈیو لگاتے ہیں کچھ دن بعد اس کے گھر والے تردید کرتے ہیں، کہتے ہیں لوگ گولیاں لگنے سے جان سے گئے، وہ آج تک نہیں مل رہے، جب سے بشریٰ بی بی کی بانی سے شادی ہوئی، پی ٹی آئی ایک ہی کام کررہی ہے، پوری پی ٹی آئی ان کے کرتوتوں کی صفائیاں دیتی ہے۔

رہنما مسلم لیگ ن نے کہا کہ حکومت میں بزدار کو لگانے، پنکی، گوگی گٹھ جوڑ کی صفائیاں دیتے تھے، پی ٹی آئی بشریٰ بی بی کے کرتوت پر پردہ ڈالنے کی کوشش کررہی ہے۔