وزیر اعلیٰ پنجاب مریم نوازشریف نے کہا کہ پنجاب کے وفد کی پزیرائی اور پرتپاک خیر مقدم ہمیشہ یاد رہے گا۔

وزیر اعلیٰ پنجاب مریم نوازشریف چین کے آٹھ روزہ سرکاری دورے کے چھٹے روز گوانگ زو پہنچ گئیں، جہاں انہوں نے گوانگ ژو کے وائس گورنر مسٹر زینگ گوزی سے ملاقات کی۔

وزیراعلیٰ مریم نواز کے اعزاز میں خصوصی اسٹیٹ ڈنر کا اہتمام کیا گیا، جس پر مریم نوازنے پرتپاک میزبانی پر شکریہ ادا کیا۔

ملاقات کے دوران گفتگو کرتے ہوئے وزیراعلیٰ مریم نواز نے کہا کہ پاکستان اور چین ایک دوسرے سے اخلاص کی ڈوری میں بندھے ہیں، چین تاریخ کے ہر موڑ پر ہمیشہ پاکستان کے ساتھ کھڑارہا۔

انہوں نے یہ بھی کہا کہ پاکستان اورچین کے عوام بھی ایک دوسرے کے ساتھ منسلک ہیں، دروہ چین  بصیرت افروز ہے، بہت کچھ جاننے سمجھنے اور دیکھنے کا موقع ملا، مجھے یقین ہے کہ پنجاب کے عوام دورے چین کے ثمرات سے پوری طرح مستفید ہوں گے۔

دوسری جانب وائس گورنر گوانگ ژو نے کہا کہ وزیراعلیٰ پنجاب مریم نواز کی آمد کو خوش بختی سمجھتے ہیں، عوام کی خدمت اور فلاح وبہبود کیلئے وزیراعلیٰ مریم نوازشریف کی کاوشیں قابل تحسین ہیں۔

واضح رہے کہ مریم نواز چین کا دورہ کرنے والی پہلی پاکستانی خاتون وزیر اعلیٰ ہیں، وزیر اعلیٰ پنجاب 8 سے 15 دسمبر تک چین کا دورہ کر رہی ہیں۔

 سینیئر صوبائی وزیر مریم اورنگزیب، وزیر اطلاعات وثقافت عظمیٰ زاہد بخاری، وزیر ٹرانسپورٹ بلال اکبر، وزیر زراعت عاشق کرمانی سمیت اعلیٰ سطح وفد بھی مریم نواز کے ہمراہ موجود ہے۔