اسلام آباد: صدر مملکت آصف علی زرداری اور وزیر اعظم شہباز شریف نے لکی مروت میں کامیاب آپریشن اور 5 خوارجی دہشتگردوں کو جہنم واصل کرنے پر سیکیورٹی فورسز کو خراج تحسین پیش کیا ہے۔

آئی ایس پی آر کے مطابق سیکیورٹی فورسز نے خیبرپختونخوا کے ضلع لکی مروت میں انٹیلی جنس پر مبنی آپریشن کرتے ہوئے 5 خوارج کو جہنم واصل کردیا جب کہ 2 خوارج دہشتگردوں کو زخمی حالت میں گرفتار کیا گیا ہے۔

صدر مملکت اور وزیر اعظم شہباز شریف نے لکی مروت میں کامیاب آپریشن پر سیکیورٹی فورسز کو خراج تحسین پیش کیا ہے۔

صدر مملکت

صدر مملکت آصف علی زرداری نے خوارج کے خلاف کامیاب آپریشن پر سیکیورٹی فورسز کو خراج تحسین پیش کرتے ہوئے سراہا۔

صدر مملکت نے 5 خوارج کو جہنم واصل کرنے اور 2 کو زخمی کرنے پر فورسز کی بہادری کی تعریف کی اور دہشت گردی کے مکمل خاتمے تک کارروائیاں جاری رکھنے کے عزم کا اظہار کیا۔

وزیر اعظم

وزیر اعظم شہباز شریف نے لکی مروت میں آپریشن کے دوران 5 خوارج کو جہنم واصل کرنے اور 2 کو زخمی کرنے پر فورسز کو خراج تحسین پیش کیا۔

وزیر اعظم نے کہا کہ انسانیت کے دشمنوں کے مذموم عزائم اسی طرح خاک میں ملاتے رہیں گے، حکومت ملک سے خوارج اور دہشت گردی کے مکمل خاتمے کے لیے سرگرم ہے۔