حکومت سندھ نے یونیورسٹیوں میں کنٹریکٹ پر تقرریوں سے متعلق اپوزیشن کے الزامات کو سختی سے مسترد کردیا ہے۔

وزیر اطلاعات سندھ شرجیل انعام میمن نے اپنے جاری کردہ ایک بیان میں کہا کہ ایم کیو ایم اور جماعت اسلامی کے الزامات زمینی حقائق کے منافی ہیں، ایم کیو ایم پی اور جماعت اسلامی اپنے ایجنڈوں کے لیے معاملے کو سیاسی رنگ دینے کی کوشش کر رہی ہیں۔

انہوں نے کہا کہ کنٹریکٹ پر تقرریوں کا نفاذ کوئی دخل اندازی نہیں، اس کا مقصد طریقہ ہائے کار پر عمل کروانا ہے، عوام کو گمراہ کرنے اور علمی برادری میں غیر ضروری بے چینی پیدا کرنے سے گریز  کیا جائے۔

ان کا کہنا تھا کہ حکومتی اقدامات کا مقصد شفافیت اور احتساب کو یقینی بناتے ہوئے تعلیمی شعبے میں انتہائی ضروری اصلاحات لانا ہے، بھرتی پالیسی تمام تقرریاں سختی سے میرٹ پر اور غیر جانبدار کروانے کے لئے متعارف کروائی جا رہی ہے۔

شرجیل انعام میمن نے کہا کہ سندھ حکومت یونیورسٹیوں کی خودمختاری برقرار رکھنے کے لیے پُرعزم ہے، حکومت سندھ نے کراچی یونیورسٹی میں ٹرانسپورٹ کی سہولیات کو بہتر بنانے اور ٹیوشن فیسوں تک رسائی کو یقینی بنانے کے لیے پہلے ہی اقدامات شروع کر دیے ہیں۔

وزیر اطلاعات سندھ کا کہنا تھا کہ آپریشنل معاملات میں ڈھانچہ جاتی اصلاحات کی ضرورت ہے، ایم ڈی کیٹ کے حوالے سے سخت اقدامات کئے گئے ہیں، بدعنوانی کے ذمہ دار پائے جانے والوں کے خلاف سخت کارروائی کی جا رہی ہے۔

انہوں نے کہا کہ کراچی ڈویژن ایم ڈی کیٹ کے لیے آئی بی اے کراچی اور باقی سندھ کے لیے آئی بی اے سکھر سخت نگرانی میں ٹیسٹ ہونگے، نصاب اور پیپر پیٹرن میں کوئی تبدیلی نہیں کی جائے گی، صرف پہلے سے رجسٹرڈ امیدوار حصہ لینے کے اہل ہونگے۔

ان کا کہنا تھا کہ فیصلے کا مقصد میرٹ کو برقرار رکھنا اور سندھ کے میڈیکل اور ڈینٹل کالجوں میں داخلوں کو شفاف بنانا ہے، تمام فریق سندھ کے طلباء اور اساتذہ کا مستقبل کے لیے ہمارے ساتھ ہاتھ بٹائیں۔