اسلام آباد: قومی احتساب بیورو (نیب) نے عوام کو جعل سازوں کے نئے طریقوں سے محتاط رہنے کا انتباہ جاری کردیا۔

نیب کے جاری کردہ انتباہ میں جعل سازی، فراڈ اور لوٹ مار کے مختلف طریقوں کے متعلق آگاہی فراہم کی گئی ہے۔

نیب کے مطابق غیر رجسٹرڈ ہاؤسنگ اسکیموں کی فائلوں کی خرید و فروخت نا کریں، اے ٹی ایم کارڈ بلاک ہونے کے جعلی پیغامات پر جواب یا تفصیلات نا دیں۔

نیب کا کہنا ہے کہ سرمایہ کاری کے بدلے میں غیر حقیقی انعام کا وعدہ بھی فراڈ کی ایک قسم  ہے، کرپٹو کرنسی کی آن لائن ٹریڈنگ کے فراڈ سے بھی  محتاط رہا جائے۔

نیب نے کہا کہ عوام غیر قانونی ڈپازٹ اور پرائیویٹ لون ایپس پر بھی اعتبار نا کریں۔ ملٹی لیول مارکیٹنگ، پونزی اسکیمیں اور آن لائن لاٹری جیسے فراڈ اور اسکیم سے محفوظ رہیں۔

ان کا کہنا تھا کہ بی آئی ایس پی فنڈز کے جعلی پیغامات اور فارن کرنسی کی آن لائن ٹریڈنگ سے اجتناب کریں۔ آن لائن ملازمت یا ویزا فراڈ، جعلی انشورنس کوریج کی پیشکش، مالی فراڈ اور دھوکہ دہی سے بچیں۔

نیب نے انتباہ جاری کرتے ہوئے کہا کہعوام اپنی ذاتی یا بینک اکاؤنٹ کی معلومات جیسے پاس ورڈ یا پن کوڈ کسی کو مت دیں، زیادہ اور غیر حقیقی منافع کے لالچ میں مت آئیں۔

نیب نے یہ بھی انتباہ جاری کیا کہ تصدیق کرلیں کہ سرمایہ کاری کی اسکیم متعلقہ ریگولیٹر یا مجاز اتھارٹی سے منظور شدہ ہے، سرمایہ کاری کی شرائط و ضوابط اچھی طرح پڑھ اور سمجھ لیں۔ احتیاط، پچھتاوے سے بہتر ہے باخبر رہیں اور محفوظ رہیں۔