گورنر اسٹیٹ بینک جمیل احمد نے کہا کہ دیہاتوں میں ڈیجیٹل بینک مثبت اثرات مرتب کر سکتے ہیں۔

گورنر اسٹیٹ بینک جمیل احمد نے مرکزی بینک میں ایزی پیسہ کی تقریب سے خطاب کرتے ہوئے کہا کہ مجھے خوشی ہے کہ ایزی پیسہ کو تاریخ کا پہلا ڈیجیٹل ریٹیل بینکنگ لائسنس جاری کرنے جارہے ہیں، اس سے ڈیجیٹل بینکاری میں ایک نیا سلسلہ شروع ہوگا۔

جمیل احمد نے کہا کہ اسٹیٹ بینک کے ڈیجیٹل اقدام سے مثبت اثرات مرتب ہوئے، جبکہ جنوری 2022 میں ڈیجیٹل بینکاری کے فریم ورک سے اہم پیشرفت ہوئی، جبکہ اس پیشرفت کے خوش آئند تاثرات ملے ہیں۔

گورنر اسٹیٹ بینک نے کہا کہ جنوری 2023ء میں 5 درخواست گزار بینکوں کو شارٹ لسٹ کیا گیا، ایزی پیسہ بینک، مشرق بینک، ہوبو بینک پاکستان، رقمی پاکستان بینک، کے ٹی بینک یہ پانچ بینک ہیں، آج ایزی پیسہ بینک کو پہلا لائسنس جاری کیا جارہا ہے۔

جمیل احمد نے کہا کہ ڈیجیٹل بینکنگ سے مالیاتی شمولیت میں مزید بہتری لائی جاسکتی ہے، ان پانچ بینکوں کے مالیاتی شمولیت سے لے کر ڈیجیٹل ماحول کی بہتری جیسے پانچ اہداف ہیں۔

گورنر اسٹیٹ بینک کا یہ بھی کہنا تھا کہ ایس ایم ایز کی نمو کے لیے خوش آئند ثابت ہوسکتے ہیں، ڈیجیٹل بینکوں کو مالیاتی شمولیت اور ڈیجیٹل سیکورٹی کو مدنظر رکھنا ہو گا۔

جمیل احمد نے کہا کہ ایزی پیسہ اور اسٹیٹ بینک کی ٹیم کو مبارکباد پیش کرتا ہو،  ہمیں ڈیجیٹل نظام میں منتقلی کے لیے مل کر کام کرنا ہے تاکہ شہریوں کی زندگی میں بہتری لائی جاسکے۔