لاہور: وزیراعلیٰ پنجاب مریم نواز نے کہا ہے کہ اب وقت آگیا ہے انڈسٹریلائزیشن کی بڑی مارکیٹ بنائیں۔

مریم نواز نے تقریب سے خطاب کرتے ہوئے کہا کہ معیشت تب ترقی کرتی ہے جب اس کا پھل عام آدمی کو ملتا ہے، کسی بھی ملک نے انڈسٹریلائزیشن کے بغیر ترقی نہیں کی، اب وقت آگیا ہے انڈسٹریلائزیشن کی بڑی مارکیٹ بنائیں۔

انہوں نے کہا کہ میں آج پنجاب کے تاجروں کے لیے پیکج لے کر آئی ہوں،  چھوٹے، درمیانے درجے کے کاروبار سے مقامی انڈسٹری کو فائدہ ہوتا ہے، ہم آج چیف منسٹر آسان کاروبار کارڈ لے کر آئے ہیں۔

وزیراعلیٰ نے کہا کہ 3 کروڑ روپے تک کا قرضہ بلاسود ملے گا، آپ کوکسی این اوسی، لائسنس، نقشہ پاس کرانے کی ضرورت نہیں، آپ کاروبار کرنے کا فیصلہ کریں، پنجاب بینک کو اپلائی کریں، ہم نے آپ کے لیے بزنس پلان بھی بنادیا ہے۔

انکا کہنا تھا کہ قرضہ ملنے کے بعد بھی کوئی مشکل آتی ہے ت وبھی مدد کریں گے، آپ آج قرضہ لے لیں کل سے اپنا کام شروع کردیں، آپ کو نقشہ پاس کرانا ہے تو وہ ہوتا رہے گا۔

مریم نواز نے کہا کہ وزیراعظم شہبازشریف کی حکومت نے ملک کوڈیفالٹ سے بچایا، نوازشریف کے دور میں دہشت گردی ختم ہوگئی تھی، ان کے دور میں ملک معاشی طور پر مستحکم تھا۔

انہوں نے کہا کہ پی ٹی آئی کے دور حکومت میں ملک کی تباہی ہوئی، موجودہ حکومت میں اب دوبارہ ملک ترقی کررہا ہے، اللہ کا شکر ہے تمام اکنامک انڈیکیٹرز بہتر ہو رہے ہیں۔

وزیراعلیٰ پنجاب نے مزید کہا کہ اسٹاک مارکیٹ 1 لاکھ 18 ہزار کراس کرگئی ہے، ترسیلات زربڑھ گئیں، فارن ریزرو بہترہورہے ہیں، مہنگائی بھی نیچے آئی ہے شرح سود بھی کم کیا جارہا ہے، بجلی کی قیمت میں 11 روپے کی کمی کا اعلان کل ہوا ہے۔