اسلام آؓباد: پاکستان پیپلزپارٹی کی سینٹرل ایگزیکٹو کمیٹی نے ن لیگ سے پاورشیئرنگ فارمولے پر مذاکرات کا اختیار صدرمملکت کو دے دیا۔

ذرائع کے مطابق پاکستان پیپلزپارٹی کی سینٹرل ایگزیکٹو کمیٹی کا زرداری ہاؤس اسلام آباد میں منعقد ہونے والا اجلاس ختم ہوگیا ہے جس میں پیپلزپارٹی نے ن لیگ سے مذاکرات کے لئے تمام کمیٹیاں تحلیل کردی ہیں۔

ذرائع کا کہنا ہے کہ ن لیگ سے پاورشیئرنگ فارمولے پر مذاکرات کا اختیار صدر مملکت آصف علی زرداری کو دے دیا ہے، صدر مملکت وزیراعظم سے پاور شیئرنگ فارمولے پر مذاکرات کریں گے۔

ذرائع نے بتایا کہ اجلاس میں وفاق کی جانب سے زرعی ٹیکس لگانے پر تحفظات کا اظہار کیا گیا، سی ای سی نے زراعت پر عائد ٹیکس 45 سے کم کرکے 20 فیصد کرنے کی بھی تجویز دی جب کہ ارکان نے کہا کہ پیکا ایکٹ میں ترامیم پر پارٹی کو واضح مؤقف اختیارکرنا چاہئے۔

اجلاس کے بعد پیپلزپارٹی کے رہنما نئیر بخاری نے میڈیا سے گفتگو میں کہا کہ سی ای سی اجلاس میں ملکی سیاسی صوتحال پرغور کیا گیا جب کہ اجلاس میں پارا چنار کی صورت حال پر بھی غور کیا گیا ہے۔

نئیر بخاری کا کہنا ہے کہ سی ای سی نے گورنر کی کے پی کی صورت حال پر اے پی سی کو سراہا اور مشترکہ مفادات کونسل کا اجلاس فوری بلانے کا مطالبہ کیا۔ کمیٹی نے مختلف اداروں میں ملازمین مخالف اقدامات پر بھی تشویش کا اظہار کیا۔

انہوں نے کہا کہ صدر آصف زرداری ریاست کے سربراہ ہیں اور اپنی آئینی ذمہ داریاں پوری کریں گے جب کہ سی ای سی نے مقبوضہ کشمیر میں بھارتی مظالم کی مذمت کی اور حکومت کی زرعی پالیسی پر تنقید کی گئی۔

نئیر بخاری نے مزید کہا کہ سی ای سی میں حکومت کی زرعی پالیسی پر تشویش کا اظہار کیا گیا ہے جب کہ اسلام آباد اور راولپنڈی میں بلدیاتی انتخابات کا مطالبہ کرتے ہیں، اجلاس میں گلگت بلتستان کے عوام کو حقوق دینے کا بھی مطالبہ کیا گیا ہے۔