لاہور: وزیراعلیٰ پنجاب مریم نواز نے فروری میں 20 ہزار گھروں کی تعمیر کا ٹارگٹ دے دیا۔

وزیر اعلیٰ مریم نواز کی زیر صدارت خصوصی اجلاس ہوا جس میں اپنی چھت، اپنا گھر پروگرام کے پراجیکٹس پر پیش رفت کا تفصیلی جائزہ لیا گیا۔

اجلاس میں پنجاب میں بے گھر شہریوں کو مفت پلاٹ دینے کیلئے اسکیم کا تفصیلی جائزہ، سفارشات اور تجاویز پر بھی غور کیا گیا۔

اجلاس کے دوران بریفنگ دی گئی کہ 9015 مکانوں کی تعمیر کے لئے 8ارب 20کروڑ روپے کے قرضے جاری ہیں، 2050 افراد کو مکانات کی تعمیرات کیلئے قرض کی دوسری قسط بھی مل گئی۔

بریفنگ میں بتایا گیا کہ اپنی چھت، اپنا گھر پروگرام کے تحت 4841 گھر زیر تکمیل ہیں، اپنی چھت، اپنا گھر پورٹل پر وزٹ کرنے والے شہریوں کی تعداد 7 لاکھ 28ہزار سے بڑھ گئی۔

بریفنگ کے مطابق اپنی چھت،اپنا گھر کیلئے تقریباً 4لاکھ سے زائد درخواستیں مکمل دستاویزات کے ساتھ آگئیں، 74ہزار سے زائد ڈرافٹ ایپلی کیشن بھی اپنی چھت، اپنا گھر پورٹل میں جمع ہوگئیں جبکہ دستاویزات جمع کرانے کا عمل جاری ہے۔

اجلاس میں عوام کو فری پلاٹ دینے کے لئے ٹی او آرز طے کرنے کے لئے 8 رکنی کمیٹی قائم کردی گئی اور فروری تک 20 ہزار گھروں کی تعمیر کا ٹارگٹ دے دیا گیا۔

وزیراعلیٰ مریم نواز نے پنجاب میں گھر بنانے کا ہدف پورا کرنے کا حکم دیتے ہوئے کہا کہ سالانہ ایک لاکھ گھروں کی تعمیر کا ہدف ہر صورت پورا کیا جائے۔

اجلاس میں بتایا گیا کہ پنجاب کے 22 اضلاع میں 35 ہاؤسنگ اسکیمیں، 2807 پلاٹوں کی ڈویلپمنٹ کا کام مکمل ہوگیا جبکہ اس دوران 7اضلاع میں 9 ہاؤسنگ اسکیمیں اور 1119 پلاٹوں کی ڈویلپمنٹ کا عمل تیز کرنے کا حکم بھی دے دیا گیا۔