اسلام آباد: پاکستان اور ترکیہ نے تجارتی اور سرمایہ کاری تعلقات بڑھانے کی ضرورت پر زور دیا ہے۔

صدر مملکت آصف علی زرداری اور ترک صدر رجب طیب اردوان کی ایوانِ صدر میں ملاقات ہوئی جب کہ ایوانِ صدر آمد پر صدر مملکت آصف علی زرداری نے ان کا پرتپاک استقبال کیا۔

پاکستان اور ترکی نے باہمی مفاد میں تجارت، معیشت، توانائی، دفاع، سیاحت اور عوامی روابط کے شعبوں میں دوطرفہ تعاون مزید بہتر بنانے کے عزم کا اعادہ کیا۔ دونوں ممالک نے تجارتی اور سرمایہ کاری تعلقات بڑھانے کی ضرورت پر زور دیا۔

اس موقع پر صدر مملکت آصف علی زرداری نے کہا کہ صدر اردوان کا دورہ پاکستانی عوام کے لیے خصوصی اہمیت کا حامل ہے، ترک صدر کے دورے سے دوطرفہ تعلقات مزید مستحکم کرنے میں مدد ملے گی۔

صدر مملکت کا کہنا تھا کہ پاکستان میں سرمایہ کاری کے لیے سازگار ماحول ہے، پاکستان ترکی کے کاروباری اداروں کی جانب سے پاکستانی اسٹاک مارکیٹ اور معیشت کے اہم شعبوں میں مزید سرمایہ کاری کا خواہاں ہے۔

صدر مملکت نے دونوں ممالک کے بینکاری شعبوں میں تعاون بڑھانے پر زور دیتے ہوئے کہا کہ پاکستان اور ترکیہ کے مابین دوطرفہ تجارتی حجم کو اس کی بھرپور صلاحیت تک بڑھانا ہوگا۔

صدر مملکت نے سیاحت اور عوامی روابط کے فروغ کے لئے پاکستان اور ترکیہ کے مابین فضائی روابط بڑھانے کی ضرورت پر بھی زور دیا جب کہ ملاقات میں علاقائی اور بین الاقوامی مسائل بالخصوص غزہ اور شام پر بھی تبادلہ خیال کیا گیا۔

دونوں صدور نے عالمی اور علاقائی امن و استحکام کے فروغ کے لیے مل کر کام کرنے پر اتفاق کیا، صدر مملکت نے ترک صدر رجب طیب اردوان کا کشمیریوں کے حق خودارادیت کی اصولی حمایت پر شکریہ ادا کیا۔

ترک صدر اردوان نے دوطرفہ اقتصادی تعلقات مضبوط بنانے کے لیے ترکیہ کے عزم کا اعادہ  کرتے ہوئے کہا کہ ترکیہ کی کمپنیوں کو پاکستان میں سرمایہ کاری کرنے کی ترغیب دیتے رہیں گے، ترکیہ پاکستان کے ساتھ دو طرفہ تجارت کو 5 ارب ڈالر تک بڑھانے کا خواہاں ہے۔

ترک صدر نے پاک-ترکیہ دوستی آئندہ نسلوں کو منتقل کرنے کے لیے عوامی روابط بڑھانے پر زور دیا اور ترکیہ کے صدر نے پاکستان کی ترقی اور امن و استحکام کے حصول کو سراہا۔

صدر رجب طیب اردوان نے قبرص پر پاکستان کی جانب سے مسلسل حمایت پر صدر پاکستان کا شکریہ بھی ادا کیا۔

ترک صدر کا کہنا تھا کہ جموں و کشمیر کا تنازعہ بات چیت کے ذریعے اقوام متحدہ کی سلامتی کونسل کی قراردادوں کے مطابق حل ہونا چاہیے۔

صدر آصف علی زرداری نے صدر اردوان ، ترک خاتون اول اور وفد کے اعزاز میں عشائیے کا بھی اہتمام کیا ہے۔