کراچی: وفاقی وزیر داخلہ محسن نقوی نے شہریوں کی سہولت کیلئے بڑا اقدام کرتے ہوئے کراچی کے علاقے ناظم آباد میں واقع نادرا میگا سینٹر میں بھی پاسپورٹ آفس کھول دیا۔

وزیر داخلہ محسن نقوی نے نادرا میگا سینٹر ناظم آباد میں قائم نئے پاسپورٹ آفس کا افتتاح کردیا، پاسپورٹ آفس 3 شفٹ میں24/7 کام کرے گا، شہری 24 گھنٹے پاسپورٹ بنوا سکیں گے۔

اس موقع پر وزیر داخلہ محسن نقوی نے پاسپورٹ بنوانے کے کاونٹرز کا معائنہ کیا اور عملے سے  ملاقات کی۔

محسن نقوی نے نادرا میگا سینٹر میں شناختی کارڈز اور پاسپورٹ بنوانے کے لئے آئے شہریوں سے ملاقات کی اور پراسیس کے بارے میں پوچھا۔

شہریوں نے بہترین سہولتوں کی فراہمی پر اطمینان کا اظہار کیا اور وزیر داخلہ محسن نقوی کا شکریہ ادا بھی کیا۔

شہریوں نے وزیر داخلہ سے گفتگو کرتے ہوئے کہا کہ بہت زبردست سہولت ملی ہے، آپ نے ہمارے لئے بہت آسانیاں پیدا کر دی ہیں۔

محسن نقوی نے بےنظیر انکم سپورٹ پروگرام کے تحت بائیو میٹرک کرانے کے لئے خواتین کے مسائل سنے اور موقع پر ہی متعلقہ حکام کو حل کیلئے ہدایات دیں۔

بزرگ خواتین نے مسائل کے حل کیلئے فوری احکامات پر وزیر داخلہ محسن نقوی کا شکریہ ادا کیا، جس پر انہوں نے کہا کہ آپ کے مسائل حل کرنا ہماری ذمہ داری ہے۔

اس دوران وفاقی وزیر محسن نقوی کو نادرا سینٹر میں قائم پاسپورٹ آفس کی ورکنگ کے بارے میں بھی بریفنگ دی گئی۔

واضح رہے کہ ڈی جی پاسپورٹ مصطفیٰ جمال قاضی اور اعلیٰ حکام بھی اس موقع پر موجود تھے۔