کراچی: سندھ کے وزیر اطلاعات شرجیل میمن نے پیر سے اسلحہ کی نمائش اور غیر رجسٹرڈ گاڑیوں کے خلاف مہم شروع کرنے کا اعلان کردیا۔

شرجیل میمن کراچی میں پریس کانفرنس کرتے ہوئے کہا کہ اہلکاروں کو سادہ لباس میں اسلحہ کی نمائش کرتے ہوئے پایا گیا تو ان کے خلاف کارروائی کی جائے گی۔

انہوں نے کہا کہ غیر رجسٹرڈ گاڑیاں شوروم سے باہر نہیں نکلیں گی کیونکہ یہ قانون سندھ حکومت نے پاس کیا ہے، گاڑیوں کی فٹنس پر تمام ٹرانسپورٹر تنظیموں سے ملاقات ہو چکی ہے اور ان قوانین پر سختی سے عمل درآمد کیا جائے گا۔

وزیر اطلاعات نے واضح کیا کہ اگر غیر رجسٹرڈ گاڑیاں شہر میں نظر آئیں گی تو ان کے خلاف گرفتاری کی کارروائی کی جائے گی۔

شرجیل میمن کا کہنا تھا کہ سندھ پاکستان کا پہلا صوبہ ہے جس نے اس نوعیت کے اقدامات اٹھائے ہیں تاکہ سڑکوں پر اسلحہ کی نمائش اور غیر رجسٹرڈ گاڑیوں کا سلسلہ روکا جا سکے۔

انہوں نے بتایا کہ ٹرانسپورٹرز نے یقین دلایا ہے کہ جتنے بھی نئے قوانین بنیں گے ان پر مکمل عمل کیا جائے گا۔

شرجیل میمن نے مزید کہا کہ ایکٹ کے تحت اگر ٹریفک حادثات یا گن شاٹ کی وجہ سے کسی فرد کو زخمی کیا جاتا ہے تو وہ نجی اسپتال جا سکتا ہے اور علاج کا خرچہ سندھ حکومت برداشت کرے گی۔

انہوں نے کابینہ کے فیصلے کا ذکر کرتے ہوئے کہا کہ گورنر سندھ کے بل پر اعتراضات کو مسترد کر دیا گیا ہے اور سندھ کابینہ نے ایک ایک اعتراض کا جائزہ لے کر ان کو مسترد کردیا ہے تاہم پیر کے روز بل دوبارہ سندھ اسمبلی میں پیش کیے جائیں گے۔

وزیر اطلاعات نے والدین سے درخواست کی کہ کم عمر بچوں کو گاڑی چلانے کی اجازت نہ دیں کیونکہ اس سے حادثات کا خدشہ ہوتا ہے۔

پریس کانفرنس کے اختتام پر شرجیل میمن نے انفلوئنزا کے بڑھتے ہوئے کیسز پر بھی تشویش کا اظہار کرتے ہوئے کہا کہ انفلوئنزا انفیکشن کا اثر کم از کم 10 دن تک رہتا ہے اور اس سے بچاؤ کے لیے احتیاطی تدابیر ضروری ہیں۔