لاہور: وزیراعلیٰ پنجاب مریم نواز شریف نے کہا ہے کہ ریڈیو پاکستان لوگوں تک معلومات، تفریح اور تعلیم کی فراہمی میں اہم کردار ادا کررہا ہے۔

وزیراعلیٰ مریم نواز نے ریڈیو کے عالمی دن پر ریڈیو کے تمام سامعین اور تمام متعلقین کو مبارکباد دیتے ہوئے کہا کہ ریڈیو ابلاغیات کی دنیا میں اختراع کا آغاز ہے، ریڈیو دنیا بھر میں تاحال اجتماعی ذریعہ خبر رسانی کا طاقتور ترین ذریعہ ہے۔

انہوں نے کہا کہ عوام کو تعلیم، معلومات اور تفریح کی فراہمی کیلئے بنیادی میڈیم کے طور پر ریڈیو کی اہمیت سے انکار ممکن نہیں، ریڈیو آج بھی معتبر ذریعہ خبر رسانی ہے۔

مریم نواز نے کہا کہ تعلیمی نشریات کی بدولت ریڈیو سماجی زندگی کا اہم کردارہے، ریڈیو پاکستان نے فنون لطیفہ موسیقی، تفریح، صوتی تھیٹر، ثقافت  میں جوہر قابل متعارف کرائے، ریڈیو چینلز جدید ٹیکنالوجی کے امکانات کے ساتھ ساتھ اپنی نشریات کو جاری رکھے ہوئے ہیں۔

 انکا کہنا تھا کہ علاقائی اور قومی سطح پر 933 ریڈیو چینلز خبروں اور موسیقی کروڑوں انسانوں تک آواز پہنچا رہے ہیں، ریڈیو پاکستان لوگوں تک معلومات، تفریح اور تعلیم کی فراہمی میں اہم کردار ادا کررہا ہے۔

وزیراعلیٰ نے مزید کہا کہ اہم ذریعہ ابلاغ کے طور پرریڈیو نشریات کو فروغ دینے کیلئے پرعزم ہیں، چاہے آپ گھر پر ہوں، سفر کر رہے ہوں اور چاہے کہیں بھی ہوں، ریڈیو کی نشریات میسر رہتی ہیں، ریڈیو لوگوں کے ساتھ رابطہ کرنے کے لیے بہترین وسیلہ ہے۔