نوشکی: سیکیورٹی فورسز نے نوشکی میں خودکش حملے کے بعد جوابی کارروائی میں 3 دہشت گردوں کو ہلاک کردیا۔

پاک فوج کے شعبہ تعلقات عامہ (آئی ایس پی آر) کے مطابق بلوچستان کے علاقے نوشکی میں خودکش حملہ ہوا جس میں سیکیورٹی فورسز کے قافلے پر حملہ آور نے خود کو دھماکے سے اُڑا لیا۔

آئی ایس پی آر کا کہنا ہے کہ حملے میں 5 افراد شہید ہوگئے جن میں 3 سیکیورٹی اہلکار اور 2 معصوم شہری شامل ہیں۔

ترجمان پاک فوج نے بتایا کہ شہداء میں حوالدار منظور علی، حوالدار علی بلاول، نائیک عبد الرحیم، جلال الدین اور محمد نعیم شامل ہیں۔ شہداء کا تعلق مختلف علاقوں سے ہے جن میں نواب شاہ، نصیر آباد، بدین، کوئٹہ اور خاران شامل ہیں۔

آئی ایس پی آر نے مزید بتایا کہ سیکیورٹی فورسز نے حملے کے بعد فوری طور پر جوابی کارروائی کی جس کے نتیجے میں 3 دہشت گرد ہلاک ہوگئے۔

پاک فوج کے شعبہ تعلقات عامہ کا کہنا تھا کہ علاقے میں کلیئرنس آپریشن جاری ہے اور یہ کارروائی دہشت گردوں کے خاتمے تک جاری رہے گی۔

آئی ایس پی آر نے واضح کیا کہ دہشت گردوں کے خلاف سخت کارروائی کی جائے گی اور حملے کے ذمہ داران کو کیفر کردار تک پہنچایا جائے گا۔

ترجمان پاک فوج نے مزید کہا کہ سیکیورٹی فورسز اور قوم مل کر بلوچستان کے امن، استحکام اور ترقی کے دشمنوں کے خلاف متحد ہیں۔ شہداء کی قربانیاں ہمارے عزم کو مزید مضبوط کرتی ہیں۔