ملک میں بارشوں، آندھی اور ژالہ باری کی پیشگوئی کے پیش نطر محکمہ موسمیات نے الرٹ جاری کردیا ہے۔

محکمہ موسمیات کی جانب سے کل سے 27 مارچ کے دوران ملک کے مختلف علاقوں میں بارش، آندھی اور ژالہ باری کی پیشگوئی کی گئی، تاہم مغربی ہواؤں کا طاقتور سلسلہ آج رات ملک میں داخل ہوگا جو بالائی اور وسطی علاقوں کو متاثر کرے گا۔

گلگت بلتستان اور کشمیر میں کل سے 28 مارچ تک وقفے وقفے سے موسلا دھار بارش اور پہاڑوں پر برفباری متوقع ہے جبکہ خیبرپختونخوا کے مختلف علاقوں میں  کل سے 27 مارچ کے دوران بارش، گرج چمک اور چند مقامات پر ژالہ باری کا امکان ہے۔

اس کے علاوہ پنجاب اور اسلام آباد میں بھی کل سے 27 مارچ کے دوران بارش اور بعض مقامات پر ژالہ باری متوقع ہے جبکہ بلوچستان کے مختلف اضلاع میں کل اور پرسوں بارش اور آندھی کی پیشگوئی کی گئی ہے۔

سندھ کے بالائی علاقوں میں کل اور پرسوں گرد آلود ہوائیں اور آندھی چلنے کا امکان ہے، تیز ہواؤں، آندھی اور ژالہ باری سے بجلی کے کھمبے، درخت اور سولر پینلز کو نقصان پہنچ سکتا ہے۔

محکمہ موسمیات کے مطابق مری، گلیات، ناران، کاغان، چترال، دیر اور سوات میں لینڈ سلائیڈنگ اور سڑکوں پر پھسلن کا خدشہ ہے جبکہ چترال، دیر، سوات، کوہستان اور مانسہرہ میں 26 اور 27 مارچ کو اچانک سیلابی صورتحال پیدا ہوسکتی ہے۔

محکمہ موسمیات نے مزید بتایا کہ پنجاب اور خیبر پختونخوا کے میدانی علاقوں میں ژالہ باری سے کھڑی فصلوں کو نقصان پہنچنے کا بھی خدشہ ہے۔