فتنہ الخوارج کے بنوں حملے کے نتیجے میں معصوم لوگوں کی مزید شہادتیں موصول ہوگئی ہیں۔

سیکیورٹی ذرائع کے مطابق بنوں حملے کے نتیجے میں معصوم شہریوں کی شہداتوں کی تعداد بڑھ کر 12 جبکہ زخمیوں کی تعداد 32 ہو چکی ہے۔

ذرائع نے بتایا ہے کہ تین معصوم شہری مسجد میں شہید ہوئے جبکہ باقی معصوم شہری بارودی دھماکے سے بازار میں پھٹنے والی گاڑی کی وجہ سے عمارت منہدم ہونے سے شہید ہوئے۔

مصدقہ اطلاعات کے مطابق فتنہ الخوارج کے باقی ماندا خارجیوں کا فون پر افغانستان سے رابطہ ہے۔

سیکیورٹی ذرائع کا مزید کہنا ہے کہ آخری خارجی کے خاتمے تک سیکیورٹی فورسز کا کلیئرنس آپریشن جاری رہے گا۔

بنوں کینٹ پر دہشت گردوں کا حملہ ناکام

سیکیورٹی ذرائع کے مطابق گزشتہ روز افطار کے بعد دہشت گردوں نے بنوں کینٹ میں داخلے کی کوشش کی، تاہم فورسز نے بروقت کارروائی کرتے ہوئے ان کے منصوبے کو ناکام بنا دیا۔

فورسز کی کارروائی کے نتیجے میں مختلف انٹری پوائنٹس پر موجود سیکیورٹی اہلکاروں نے 6 خوارجی دہشت گرد جنہم واصل کر دیے جبکہ باقی دہشت گردوں کو محصور کر لیا گیا۔

کارروائی کے دوران دہشت گردوں نے گھبراہٹ میں 2 بارود سے بھری گاڑیاں کینٹ کی دیوار سے ٹکرا دیں،  بارود سے بھری گاڑیوں کے دھماکے سے قریبی مسجد شہید ہوگئی اور ایک گھر کی چھت بھی منہدم ہو گئی جبکہ دھماکوں کے نتیجے میں لوگوں کے زخمی ہونے اور شہادتوں کی اطلاعات بھی موصول ہوئیں۔

سیکیورٹی ذرائع نے بتایا کہ تمام خارجیوں کے خاتمے تک کلیئرنس آپریشن جاری رہے گا، فورسز کی جانب سے مزید احتیاطی تدابیر کے ساتھ علاقے کو کلیئر کیا جا رہا ہے تاکہ دہشت گردوں کا مکمل صفایا کیا جا سکے۔