پہلگام واقعہ کو بنیاد بنا کر پاکستان کے دریاؤں کا پانی روکنے سے متعلق بھارتی جھوٹا پروپیگنڈا بے نقاب ہو گیا۔

پاکستان کے دریاؤں کا پانی روکنے سے متعلق بھارتی پروپیگنڈے کو بے نقاب کرتے ہوئے سابق سینئر وفاقی وزیر اور رکن قومی اسمبلی سائرہ افضل تارڑ نے دریائے چناب کے کنارے دورہ کیا اور ویڈیو پیغام کے ذریعے دنیا کو زمینی حقائق دکھا دیے۔

سائرہ افضل تارڑ نے اپنے دورے کے دوران کہا کہ اللہ کے فضل و کرم سے دریائے چناب اپنی پوری آب و تاب کے ساتھ رواں دواں ہے، اور کسی میں مجال نہیں کہ پاکستان کے حق کا پانی روک سکے۔

مزید پڑھیں: جعلی خاکوں سے جھوٹی کہانی گھڑنے کی مودی سرکار کی سازش بے نقاب

انہوں نے بھارتی پروپیگنڈے کو جھوٹ اور بے بنیاد قرار دیتے ہوئے کہا کہ ایسے دعوے نہ صرف غیر حقیقی ہیں بلکہ بھارتی حکومت کے منفی عزائم کو ظاہر کرتے ہیں۔

ان کا مزید کہنا تھا کہ پاکستان کا پانی روکنے کے دعویداروں کے پاس نہ ایسی صلاحیت ہے اور نہ ہی ہمت۔ انہوں نے پاکستانی قوم کی دعاؤں اور اللہ کی مہربانی کا تذکرہ کرتے ہوئے کہا کہ یہ دریا اسی طرح بہتے رہیں گے، انشاء اللہ۔

سائرہ افضل تارڑ نے واضح کیا کہ بھارت کی جانب سے سرحدی اور آبی جارحیت کے کسی بھی اقدام کا پاکستان بھرپور اور مؤثر جواب دینے کی مکمل صلاحیت رکھتا ہے۔

ان کا مزید کہنا تھا کہ بھارت کا پاکستان کے دریاؤں کا پانی روکنے کا خواب کبھی پورا نہیں ہو گا، اور قوم ہر محاذ پر اپنی خودمختاری اور پانی کے تحفظ کے لیے متحد ہے۔