پیپلز پارٹی، ن لیگ میں کشیدگی، حکومت نے پیپلزپارٹی سے ایک بار پھر اعلیٰ سطحی رابطہ کیا ہے۔

پاکستان پیپلز پارٹی کے ذرائع نے تصدیق کی کہ حکومت نے پیپلزپارٹی کو پرکشش  آفرز کی ہیں، تاہم پی پی نے حکومت کی تمام  پیشکشیں مسترد کرتے ہوئے آفرز کے  بجائے سی سی آئی کا اجلاس بلانے کا مطالبہ کیا ہے۔

پی پی ذرائع کے مطابق پیپلزپارٹی نے کینالز لنک کے مطالبہ سے پیچھے ہٹنے سے انکار کرتے ہوئے کہا کہ نہروں کا فیصلہ واپس لینا پی پی کا یک نکاتی مطالبہ ہے، پیپلزپارٹی نہروں کے مطالبہ سے ایک انچ پیچھے نہیں ہٹے گی۔

ذرائع کا کہنا ہے کہ حکومت نے پیپلزپارٹی کو ترقیاتی منصوبوں کیلئے بھاری فنڈنگ کی آفرز کرتے ہوئے سکھر موٹروے کیلئے فنڈز فراہمی کی یقین دہانی کرائی، اس کے علاوہ سندھ، بلوچستان کے منصوبے پی ایس ڈی پی میں لینے کی آفر بھی کی۔

پیپلزپارٹی نے حکومت کو جواب میں کہا کہ  جینا مرنادریائے سندھ  کے ساتھ ہے، جبکہ پی پی اٹھارہ اپریل سے سڑکوں پر دمادم مست قلندر کرے گی، حکومت نے مجبور کیا تو فیصلے سڑکوں پر عوام کے ساتھ ہوں گے۔

واضح رہے کہ اس سے قبل ن لیگ کی اہم شخصیت نے نوید قمر سے رابطہ کر کے ملاقات کی درخواست کی، جس کے بعد پیپلزپارٹی اور ن لیگی وفد کی ملاقات پارلیمنٹ ہاوس میں ہوئی جو کہ بے نتیجہ رہی تھی۔

ملاقات میں ن لیگ نے پی پی کو تحفظات دور کرنے کی ایک بار پھر یقین دہانی کراتے ہوئے پارلیمان کی کارروائی میں تعاون، قومی اسمبلی میں اہم قانون سازی میں حمایت اور کورم میں تعاون کی اپیل کی تھی۔