پاک فوج کے شعبہ تعلقات عامہ (آئی ایس پی آر) کے مطابق 25 اور 26 اپریل کی درمیانی شب خارجی دہشت گردوں نے پاک افغان بین الاقوامی سرحد پر دراندازی کی کوشش کی، جسے شمالی وزیرستان کے علاقے حسن خیل میں تعینات سیکیورٹی فورسز نے بروقت کارروائی کرتے ہوئے ناکام بنا دیا۔

آئی ایس پی آر کے مطابق سیکیورٹی فورسز نے دہشت گردوں کی نقل و حرکت کا بروقت پتہ چالیا اور مؤثر جوابی کارروائی کرتے ہوئے تمام 54 خارجی دہشت گردوں کو ہلاک کر دیا۔

کارروائی کے دوران دہشت گردوں کے قبضے سے بڑی مقدار میں اسلحہ اور دھماکہ خیز مواد بھی برآمد کیا گیا۔

انٹیلیجنس رپورٹس کے مطابق یہ خارجی دہشت گرد اپنے غیر ملکی آقاؤں کے اشارے پر پاکستان میں دراندازی کی کوشش کر رہے تھے۔ ان کا مقصد ملک میں ہائی پروفائل دہشت گردی کی وارداتیں انجام دینا تھا۔

آئی ایس پی آر کا کہنا ہے کہ بھارت کی جانب سے بے بنیاد الزامات پر مبنی مہم کے دوران خارجی دہشت گردوں کی یہ کارروائیاں واضح کرتی ہیں کہ یہ عناصر کس کے مقاصد کی تکمیل کے لیے کام کر رہے ہیں۔

آئی ایس پی آر کے مطابق ایسی سرگرمیاں ریاست اور اس کے شہریوں سے غداری اور دھوکے کے مترادف ہیں، جنہیں کسی صورت برداشت نہیں کیا جائے گا۔

آئی ایس پی آر کے مطابق پاک فوج نے اس عزم کا اعادہ کیا کہ ملکی سلامتی اور خودمختاری کے خلاف کسی بھی کوشش کا منہ توڑ جواب دیا جائے گا اور دہشت گردوں کے ناپاک عزائم کو ہر قیمت پر ناکام بنایا جائے گا۔