کھاریاں چھاؤنی میں جاری 8 ویں پاکستان آرمی ٹیم اسپرٹ کمپیٹیشن مکمل ہوگیا ہے۔

پاک افواج کے شعبہ تعلقات عامہ (آئی ایس پی آر) کے مطابق آرمی چیف جنرل سید عاصم منیر 8 ویں پاکستان آرمی ٹیم اسپرٹ کمپیٹیشن کی اختتامی تقریب میں مہمان خصوصی تھے۔

آرمی چیف جنرل سید عاصم منیر نے اختتامی تقریب میں شرکاء کی پیشہ ورانہ مہارت، جسمانی و ذہنی استقامت اور اعلیٰ اخلاقی معیار کی تعریف کرتے ہوئے کہا کہ اس قسم کی مشقوں سے ایک دوسرے سے سیکھنے کا موقع ملتا ہے۔

آرمی چیف نے اختتامی تقریب سے خطاب کرتے ہوئے کہا کہ پیٹس ہمیشہ پیشہ ورانہ فوجی صلاحیتوں اور جنگی فہم و فراست کو یکجا کرتے ہوئے ہر سپاہی میں درکار ٹیم اسپرٹ کو فروغ دیتا ہے،  پاک فوج نے ہمیشہ “کردار، جرات اور مہارت” جیسی سپاہیانہ خصوصیات کو برقرار رکھا ہے۔

جنرل عاصم منیر نے یہ مزید بھی کہا کہ پاک فوج کے جوانوں نے بے مثال سپاہیانہ خصوصیات کا مظاہرہ دہشت گردی کے خلاف جنگ میں بخوبی کیا۔

واضح رہے کہ 60 گھنٹوں پر محیط کٹھن ترین پٹرولنگ ایکسرسائز کا مقصد ایک دوسرے کے تجربات سے استفادہ کرنا تھا۔

سخت اور مسلسل گشت پر محیط مشق میں شرکاء نے تجربات اور جدید  اختراعات کے تبادلے کے ذریعے جنگی صلاحیتوں کو بہتر بنایا۔

8 ویں پاکستان آرمی ٹیم اسپرٹ کمپیٹیشن میں پاکستان آرمی کی 7 جبکہ پاکستان نیوی کی 1 ٹیم  نے مشق میں حصہ لیا، اس کے علاوہ دوست ممالک کی  15 ٹیمز نے  مشقوں میں شرکت کی۔

ان مشقوں میں بحرین، بیلاروس، چین، سعودی عرب اور مالدیپ کی ٹیمز نے حصہ لیا، اس کے علاوہ مراکش، نیپال، قطر، سری لنکا، ترکی، امریکہ اور ازبکستان  بھی مشقوں میں شامل تھے۔

 بنگلہ دیش، مصر، جرمنی، کینیا، میانمار اور تھائی لینڈ  نے مبصر کے طور پر مشق کا مشاہدہ کیا۔

 پٹرولنگ مشق پنجاب کے نیم پہاڑی علاقے میں کی گئی تھی، جبکہ یہ مشق دوست ممالک کے لیے نہایت پیشہ ورانہ اور مسابقتی فوجی سرگرمی کی حیثیت اختیار کر چکی ہے۔

آرمی چیف نے مشق کے شرکاء میں انفرادی اور ٹیم کی سطح پر ایوارڈز تقسیم کیے، اس کے علاوہ بین الاقوامی مبصرین اور شریک ممالک کے دفاعی اتاشیوں نے بھی تقریب میں شرکت کی۔