پاکستان نیوی وار کالج لاہور میں 54ویں کانووکیشن کی باوقار تقریب منعقد ہوئی جس میں چیف آف دی نیول اسٹاف ایڈمرل نوید اشرف نے بطور مہمان خصوصی شرکت کی۔

پاک فوج کے شعبہ تعلقات عامہ ( آئی ایس پی آر ) کے مطابق اس پروقار تقریب کے موقع پر 118 افسران کو ڈگریاں تفویض کی گئیں، جن میں 44 افسران کا تعلق دوست ممالک سے تھا۔

تقریب سے خطاب کرتے ہوئے نیول چیف نے موجودہ جیو اسٹریٹیجک حالات پر روشنی ڈالتے ہوئے کہا کہ جنگ کی نوعیت میں نمایاں تبدیلی آ چکی ہے، اور اس کے اثرات سمندری سلامتی پر بھی مرتب ہو رہے ہیں۔

انہوں نے کہا کہ پاکستان اور بھارت کے مابین حالیہ کشیدگی اس تبدیلی کا واضح ثبوت ہے۔

مزید پڑھیں: ہمیشہ امن کو ترجیح دی، اگر جنگ چاہیے تو پھر جنگ ہی سہی؛ آئی ایس پی آر

ایڈمرل نوید اشرف نے اس بات پر زور دیا کہ غیر ریاستی عناصر اور غیر روایتی جنگی طریقہ کار نے موجودہ سیکیورٹی منظرنامے کو مزید پیچیدہ بنا دیا ہے، جس کے پیش نظر روایتی عسکری حکمت عملیوں میں بنیادی نوعیت کی تبدیلی ناگزیر ہو چکی ہے۔

نیول چیف نے کورس مکمل کرنے والے تمام افسران کو مبارکباد پیش کی اور توقع ظاہر کی کہ وہ نہ صرف ملکی دفاع بلکہ بین الاقوامی سیکیورٹی کے میدان میں بھی اہم کردار ادا کریں گے۔

تقریب کے اختتام پر مہمان خصوصی نے کامیاب گریجویٹس میں ڈگریاں تقسیم کیں۔

آئی ایس پی آر کے مطابق اس موقع پر اعلیٰ عسکری حکام، سول معززین، کورس ممبران کے اہل خانہ اور بین الاقوامی مہمانوں کی بڑی تعداد موجود تھی، جس نے تقریب کو ایک شاندار اور یادگار موقع بنا دیا۔