وزیراعلیٰ بلوچستان سرفراز بگٹی نے کہا ہے کہ افواجِ پاکستان نے دشمن بھارت کے تکبر کو خاک میں ملا کر ثابت کیا ہے کہ ریاستی طاقت کے سامنے دہشتگردوں اور ان کے سرپرستوں کی کوئی حیثیت نہیں۔

انہوں نے کہا کہ بلوچستان پاکستان کا ہراول دستہ ہے اور یہاں کے عوام اپنی سرزمین کے تحفظ کے لیے پاک فوج کے شانہ بشانہ کھڑے ہیں۔

وزیراعلیٰ سرفراز بگٹی نے علی مدد جتک کے قافلے پر حملے کی شدید الفاظ میں مذمت کرتے ہوئے کہا کہ معصوم شہریوں کو نشانہ بنانا نہ صرف بزدلانہ حرکت ہے بلکہ بلوچ روایات کے بھی سراسر منافی ہے۔

ان کا کہنا تھا کہ دہشتگردوں کا نہ بلوچستان سے کوئی تعلق ہے اور نہ ہی وہ بلوچ قوم کے نمائندہ ہو سکتے ہیں۔

مزید پڑھیں:وزیر اعلیٰ بلوچستان کی EO-1 سیٹلائٹ کی کامیاب لانچنگ پر قوم کو مبارکباد

انہوں نے واضح کیا کہ کالعدم تنظیم بلوچ لبریشن آرمی (بی ایل اے) دراصل بھارت کی پراکسی ہے، جو بیرونی ایجنڈے کے تحت ریاست پاکستان کے خلاف سرگرم ہے۔

سرفراز بگٹی کے مطابق، بلوچستان میں معصوم شہریوں اور مسافروں کو نشانہ بنانا دشمن کی ناکام کوشش ہے، جو عوام کے حوصلے پست کرنے میں کامیاب نہیں ہو سکتی۔

وزیراعلیٰ نے کہا کہ دہشتگرد عناصر ریاست کی طاقت کے سامنے ٹھہر نہیں سکتے، اور ان کے خلاف بھرپور کارروائیاں جاری رہیں گی۔

انہوں نے اس عزم کا اعادہ کیا کہ بلوچستان کے عوام پاک فوج کے ساتھ سیسہ پلائی دیوار کی طرح کھڑے ہیں اور امن و استحکام کے خلاف کسی بھی سازش کو ناکام بنانے کے لیے پرعزم ہیں۔

سرفراز بگٹی نے کہا کہ پاکستان کا ہر شہری اپنی سرزمین کے دفاع کے لیے متحد ہے، اور بلوچستان کے عوام ہمیشہ قومی سلامتی کے مفاد میں ہر قسم کی قربانی دینے کے لیے تیار رہیں گے۔