اسلام آباد: وزیراعظم محمد شہباز شریف نے کہا ہے کہ اقوام متحدہ کے امن مشن میں پاکستان کی خدمات قابلِ تحسین ہے۔

وزیراعظم نے اقوام متحدہ کے امن دستوں کے عالمی دن کے موقع پر اپنے پیغام میں امن و سلامتی کے لیے اقوام متحدہ کے کردار اور پاکستانی اہلکاروں کی قربانیوں کو خراج تحسین پیش کیا ہے۔

انہوں نے کہا کہ آج کا دن بین الاقوامی برادری کے ساتھ مل کر اُن بے شمار قربانیوں کو یاد کرنے کا دن ہے جو اقوام متحدہ کے امن اہلکاروں نے عالمی امن کے قیام کے لیے دیں۔

شہباز شریف نے اس دن کو ایک مستحکم، پرامن اور خوشحال دنیا کے قیام کے عزم کی تجدید کا موقع قرار دیا اور بتایا کہ گزشتہ سات دہائیوں کے دوران پاکستان کے 2 لاکھ 35 ہزار سے زائد اہلکاروں نے اقوام متحدہ کے 48 مختلف مشنز میں خدمات انجام دیں، جن میں 181 اہلکار عالمی امن کے لیے جان کا نذرانہ دے چکے ہیں۔

وزیراعظم نے اقوام متحدہ کی امن فوج کو درپیش چیلنجز پر بھی روشنی ڈالی، جن میں یکطرفہ پالیسیوں کا فروغ، مالی وسائل کی کمی، امن اہلکاروں کو درپیش سیکیورٹی خطرات، غلط معلومات کی بنیاد پر منفی پروپیگنڈا اور جدید ٹیکنالوجیز کے غیر متوقع اثرات شامل ہیں۔

انہوں نے کہا کہ یہ دن ان چیلنجز کے حل کی کوششوں پر توجہ مرکوز کرنے کا بھی موقع ہے۔

شہباز شریف نے بین الاقوامی برادری سے اپیل کی کہ وہ اقوام متحدہ کی امن پالیسیوں کے ساتھ اپنی وابستگی کا اعادہ کرے اور ان مشنز کو درپیش جدید چیلنجز کے مطابق ڈھالنے کی کوششوں کو دوگنا کرے۔

انہوں نے بتایا کہ ان کوششوں کے تحت پاکستان نے رواں سال 15-16 اپریل کو جمہوریہ کوریا کے ساتھ اسلام آباد میں اقوام متحدہ کے امن مشن کے وزارتی اجلاس کی میزبانی کی، جس کا موضوع “ایک محفوظ اور زیادہ مؤثر امن کی طرف: ٹیکنالوجی کا استعمال اور مربوط نقطہ نظر” تھا۔

وزیراعظم نے مزید کہا کہ پاکستان اقوام متحدہ کے قدیم ترین مشن “UNMOGIP” کا میزبان بھی ہے، جو جموں و کشمیر میں لائن آف کنٹرول پر جنگ بندی کی نگرانی کرتا ہے۔

انہوں نے خطے میں حالیہ کشیدگی کو اقوام متحدہ کی قراردادوں کے مطابق مسئلہ کشمیر کے منصفانہ حل اور UNMOGIP کے کردار کو مزید مضبوط بنانے کی ضرورت قرار دیا۔

آخر میں انہوں نے بطور ایک نمایاں فوجی تعاون فراہم کرنے والے ملک اور اقوام متحدہ کی سلامتی کونسل کے غیر مستقل رکن کے، عالمی امن کی کوششوں میں پاکستان کی حمایت اور شراکت جاری رکھنے کے عزم کا اعادہ کیا۔