اسلام آباد: وزیراعظم پاکستان شہباز شریف چار ملکی دورے کے پہلے مرحلے میں ترکیہ کے دورے پر روانہ ہوگئے، انکے ہمراہ نائب وزیراعظم و وزیر خارجہ محمد اسحاق ڈار، وفاقی وزیر اطلاعات و نشریات عطا اللہ تارڑ اور معاون خصوصی طارق فاطمی ہیں۔

ترجمان دفتر خارجہ کے مطابق وزیراعظم شہباز شریف 30 مئی تک ترکیہ، ایران، آذربائیجان اور تاجکستان کے اہم دورے پر روانہ ہو رہے ہیں، ان دوروں کا مقصد دوست ممالک کے ساتھ تعلقات کو مزید مضبوط بنانا اور حالیہ پاک بھارت کشیدگی کے دوران پاکستان کی حمایت پر ان ممالک کا شکریہ ادا کرنا ہے۔

ترجمان کے مطابق وزیراعظم ان ممالک کے رہنماؤں سے دوطرفہ تعلقات، معاشی تعاون، علاقائی سیکیورٹی اور عالمی امور پر تفصیلی بات چیت کریں گے۔

اس سفارتی دورے کو خطے میں اعتماد سازی اور تعاون بڑھانے کی ایک اہم کوشش قرار دیا جا رہا ہے۔

وزیراعظم شہباز شریف 29 اور 30 مئی کو تاجکستان کے دارالحکومت دوشنبے میں ہونے والی گلیشیئرز سے متعلق بین الاقوامی کانفرنس میں بھی شرکت کریں گے، جہاں وہ ماحولیاتی تبدیلی، پانی کے تحفظ اور پائیدار ترقی کے موضوعات پر پاکستان کا مؤقف پیش کریں گے۔

دوسری جانب نائب وزیراعظم اسحاق ڈار اور آذربائیجان کے وزیر خارجہ کے درمیان ٹیلیفونک رابطہ بھی ہوا، جس میں دو طرفہ تعلقات، علاقائی صورتحال اور وزیراعظم کے آئندہ دورہ آذربائیجان پر گفتگو کی گئی۔

دفتر خارجہ کے مطابق ان سفارتی روابط کا مقصد خطے میں تعاون، ہم آہنگی اور مشترکہ ترقی کے مواقع کو فروغ دینا ہے۔