شہر قائد کے ایف بی ایریا بلاک 15 میں دو بیٹوں کی جانب سے اپنے ہی باپ کے بہیمانہ قتل اور لاش کو چھپانے کی کوشش کا سنسنی خیز واقعہ سامنے آیا ہے۔

پولیس کے مطابق مقتول خاور انجم کو اس کے دو سگے بیٹوں، ابراہیم اور افضل، نے گھریلو جھگڑے کے دوران قتل کیا۔

واردات کی سی سی ٹی وی فوٹیج منظر عام پر آ گئی ہے، جس میں دونوں ملزمان کو لاش کو موٹر سائیکل پر رکھ کر ٹھکانے لگانے کی کوشش کرتے ہوئے دیکھا جا سکتا ہے۔

پولیس کا کہنا ہے کہ ملزمان نے خاور انجم کو میرپور خاص سے کراچی بلوایا تھا۔ گھریلو تنازعے کے بعد دونوں بیٹوں نے پہلے کولڈ ڈرنک میں چوہے مار دوا ملا کر باپ کو پلائی، اور جب مقتول کی حالت بگڑ گئی تو اسے گلا دبا کر قتل کرنے کے بعد چھری کے وار بھی کیے۔

پولیس کے مطابق واقعے کے وقت محلے کا چوکیدار بھی جائے واردات کے قریب موجود تھا، جس کی موجودگی سی سی ٹی وی فوٹیج میں دیکھی جا سکتی ہے۔ تاہم چوکیدار نے پولیس کو بیان دیا ہے کہ اسے لاش کی موجودگی کا علم نہیں تھا۔

دونوں ملزمان کو گرفتار کر لیا گیا ہے اور ان کے خلاف قتل کا مقدمہ درج کر کے تفتیش کا آغاز کر دیا گیا ہے۔ پولیس کا کہنا ہے کہ سی سی ٹی وی فوٹیج اور ابتدائی شواہد کی روشنی میں واقعہ ایک سوچی سمجھی سازش کا نتیجہ معلوم ہوتا ہے، جس کے تمام پہلوؤں کی تحقیقات کی جا رہی ہے۔