اسلام آباد: بدعنوانی، غفلت اور عوامی نقصان پر فیصلہ کن کارروائی کرتے ہوئے ڈی ایم اے نے اے جے سی ایل کے ساتھ پارکنگ معاہدہ منسوخ کردیا۔

ڈائریکٹوریٹ آف میونسپل ایڈمنسٹریشن (ڈی ایم اے) نے اسلام آباد میں پارکنگ کے حوالے سے اے جے سی ایل کمپنی کے ساتھ ہونے والا معاہدہ فوری طور پر منسوخ کر دیا ہے۔

معاہدے کی منسوخی کی وجوہات میں سنگین مالی بے ضابطگیاں، بدانتظامی اور عوامی مفاد کو نقصان پہنچانا شامل ہے۔

ڈی ایم اے کے مطابق اے جے سی ایل نے معاہدے کی بنیادی شرائط کی خلاف ورزی کی۔ کسی بھی پارکنگ سائٹ پر داخلے و اخراج کے لیے ڈیجیٹل بیرئیرز نصب نہیں کیے گئے جو شفافیت اور نگرانی کے لیے لازمی تھے۔

ڈی ایم اے کا کہنا ہے کہ پارکنگ فیس کی وصولی مکمل طور پر کیش میں کی گئی جب کہ ڈی ایم اے کے ساتھ کسی قسم کا مستند مالیاتی ریکارڈ شیئر نہیں کیا گیا۔ اس کے علاوہ اسکریچ کارڈز کا بار بار استعمال سامنے آیا جس سے سرکاری خزانے کو شدید نقصان پہنچا۔

انہوں نے بتایا کہ کمپنی کی جانب سے کسی بینکنگ چینل کے ذریعے ادائیگی یا ٹریکنگ کا ریکارڈ پیش نہیں کیا گیا۔ آمدن کا ریکارڈ دو سے تین دن کی تاخیر سے اپڈیٹ کیا جاتا رہا جو شفافیت کے تقاضوں کے خلاف تھا۔

کمپنی نے نہ تو معاہدے کے مطابق سی سی ٹی وی کیمرے لگائے اور نہ ہی سیکیورٹی فراہم کی جس کے نتیجے میں کئی گاڑیاں چوری ہوئیں۔ پولیس اسٹیشن انڈسٹریل ایریا میں AJCL کے خلاف گاڑیوں کی چوری کے کم از کم 8 مقدمات درج کیے جاچکے ہیں۔

معاہدے کی منسوخی پر اے جی سی سیل نے عدالت سے رجوع کرلیا ہے جس پر ڈی ایم اے نے قانونی ماہرین کی خدمات حاصل کرکے عدالت میں مؤقف پیش کرنے کا فیصلہ کیا ہے۔

دوسری جانب معاہدہ منسوخ ہونے کے بعد ڈی ایم اے نے پارکنگ کا مکمل کنٹرول سنبھال لیا ہے اور ابتدائی رپورٹ کے مطابق آمدن میں نمایاں اضافہ ریکارڈ کیا گیا ہے۔