اسلام آباد: وزیراعظم محمد شہباز شریف کی جانب سے دیامر بھاشا ڈیم کی فوری تکمیل پر زور دیا گیا ہے۔

وزیراعظم شہباز شریف کی زیر صدارت دیامر بھاشا ڈیم اور دیگر آبی وسائل سے متعلق ایک اعلیٰ سطحی اجلاس منعقد ہوا، جس میں ملک میں پانی کے ذخائر، زرعی ضروریات اور توانائی کی پیداوار سے متعلق امور پر تفصیلی غور کیا گیا۔

وزیراعظم نے اجلاس سے خطاب کرتے ہوئے کہا کہ ملک کی معاشی خود انحصاری کا انحصار سستی بجلی اور زراعت پر ہے  اور اس مقصد کے لیے پانی کے ذخیرے بڑھانے اور اس کے مؤثر استعمال کو ترجیحی بنیادوں پر یقینی بنانا ہوگا۔

انہوں نے واضح کیا کہ پانی ذخیرہ کرنے کی استعداد بڑھانا، زرعی شعبے کے لیے پانی کی فراہمی کو یقینی بنانا اور سیلاب کی روک تھام کے لیے نئے ڈیمز کی تعمیر ناگزیر ہے۔

وزیراعظم نے دیامر بھاشا ڈیم جیسے قومی اہمیت کے منصوبوں کو ترجیحی بنیادوں پر مکمل کرنے کی ہدایت جاری کرتے ہوئے کہا کہ ملک میں توانائی اور پانی کے وافر ذخائر کے لیے مؤثر اور مربوط نظام کی ضرورت ہے۔

انہوں نے دیامر بھاشا ڈیم کی تعمیر میں حائل تمام تر رکاوٹوں کو فوری طور پر دور کرنے اور منصوبے کی جلد از جلد تکمیل کو یقینی بنانے کی بھی ہدایت دی۔

وزیراعظم نے مزید کہا کہ ایسے منصوبے نہ صرف توانائی کی ضروریات کو پورا کریں گے بلکہ آنے والی نسلوں کے لیے پانی کی دستیابی کو بھی یقینی بنائیں گے۔

واضح رہے کہ اجلاس میں وفاقی وزیر منصوبہ بندی احسن اقبال، وفاقی وزیر امور کشمیر و گلگت بلتستان انجینئر امیر مقام، وفاقی وزیر قانون و انصاف اعظم نذیر تارڑ، وفاقی وزیر آبی وسائل معین وٹو، وزیراعظم کے مشیر برائے سیاسی امور و بین الصوبائی روابط رانا ثناءاللہ، وزیر اعلیٰ گلگت بلتستان گلبر خان اور متعلقہ اعلیٰ سرکاری افسران نے شرکت کی۔