اسلام آباد: پاکستان نے ایرانی جوہری تنصیبات پر امریکی حملوں کی شدید مذمت کرتے ہوئے واضح کیا ہے کہ وہ اپنی فضائی، زمینی یا سمندری حدود کسی بھی امریکی یا اسرائیلی کارروائی کے لیے استعمال کرنے کی اجازت نہ دی ہے اور نہ ہی دے گا۔

وزارتِ خارجہ کی جانب سے جاری کردہ بیان میں 21 اور 22 جون کی شب ایران پر امریکی حملے کو بین الاقوامی قوانین کی سنگین خلاف ورزی قرار دیتے ہوئے اس کی سخت الفاظ میں مذمت کی گئی ہے۔

بیان میں کہا گیا ہے کہ پاکستان نہ صرف ایران کے خلاف اسرائیلی حملوں کی مذمت کرتا ہے بلکہ سیاسی، سفارتی اور اخلاقی سطح پر ایران کی مکمل حمایت جاری رکھے گا۔ حکومتِ پاکستان اس مؤقف کا متعدد بار بین الاقوامی فورمز پر جرات مندی سے اعادہ کر چکی ہے۔

وزارتِ خارجہ نے کہا کہ پاکستان کسی بھی غیر ملکی جنگ، بلاک سیاست یا عسکری تنازعے کا حصہ نہیں بنے گا اور اپنا اصولی مؤقف برقرار رکھے گا کہ ایران کو اپنے دفاع کا مکمل اور جائز حق حاصل ہے۔

پاکستان نے اپنی خودمختاری اور علاقائی سالمیت پر سمجھوتے کو بھی خارج از امکان قرار دیتے ہوئے واضح کیا کہ خطے میں کسی بھی قسم کی غیر یقینی صورت حال کو بڑھاوا دینے کے بجائے امن کی بحالی کا خواہاں ہیں۔

وزارتِ خارجہ کے مطابق پاکستان تمام متعلقہ فریقین سے مسلسل رابطے میں ہے تاکہ جلد از جلد ایسی جنگ بندی ممکن ہو سکے جو پائیدار، باعزت اور تمام فریقوں کے لیے قابل قبول ہو۔

بیان کے اختتام پر پاکستان نے عالمی برادری پر زور دیا کہ وہ مشرقِ وسطیٰ کو مزید عدم استحکام اور تباہی کی طرف دھکیلنے کے بجائے امن، استحکام اور مذاکرات کو ترجیح دے۔