ایران سے پاکستانیوں کے انخلا کے حوالے ایران میں موجود پاکستان کے سفیر مدثر ٹیپو نے سماجی رابطے کی ویب سائٹ ایکس پر اپنے ایک بیان میں کہا ہے کہ پاکستانی شہری ایران سے روانگی سے قبل پاسپورٹس پر خروج پرمٹ (exit permit) کی مہر ضرور لگوائیں۔

مدثر ٹیپو نے کہا کہ پاکستانی شہری سرحد بند ہونے کے اوقات سے پہلے بارڈر کراسنگ پوائنٹس پر پہنچ جائیں۔

سرحد بند ہونے کے بعد مواصلاتی مسائل کے باعث بارڈر حکام سے رابطہ کرنا بہت مشکل ہو جاتا ہے، پاکستانی شہری کسی تیسرے ملک کا سفر کر رہے ہیں تو براہِ کرم اس ملک کا ویزا اپنے پاس رکھیں۔

پاکستانی شہریوں سے گزارش ہے کہ وہ موبائل فون مکمل چارج رکھیں، سڑکوں پر ٹریفک جام اور ایران میں طویل سفر کی وجہ سے کافی وقت لگ رہا ہے۔

بزرگ افراد، خواتین اور بچے خاص احتیاط سے سفر کریں، تمام پاکستانی شہری تہران میں سفارتخانے اور مشہد و زاہدان میں قونصل خانوں کی رابطہ معلومات اپنے پاس رکھیں۔

سفیر پاکستان کا یہ بھی کہنا ہے کہ پاکستانی شہری کسی بھی پریشانی کی صورت میں ہم سے فوراً ابطہ کریں، مناسب مالی وسائل کا ہونا بھی بہت اہم ہے۔

یہ بھی پڑھیں: ایران میں پھنسے پاکستانی بحفاظت وطن واپس پہنچ گئے

مدثر ٹیپونے مزید کہا کہ ایران میں الیکٹرانک ذرائع سے رقوم بھیجنے میں بھی شدید تاخیر اور خلل پیش آ رہا ہے،  تمام ہم وطنوں کی معاونت کے لیے ٹوئٹر پر 24 گھنٹے دستیاب ہوں۔

دوسری جانب وفاقی وزیر اوورسیز پاکستانیز چوہدری سالک حسین نے ایران میں تعینات پاکستانی سفیر مدثر ٹیپو سے ٹیلیفونک رابطہ کیا، جس میں سفیر مدثر ٹیپو نے ایران میں موجود پاکستانیوں کی باحفاظت وطن واپسی کے حوالے سے وفاقی وزیر کو آگاہ کیا۔

پاکستانی سفیر نے کہا کہ ایران میں پاکستانی سفارتخانہ پاکستانیوں کو ہر ممکن سہولت فراہم کرنے کے لیے کام کر رہا ہے، سفارتخانے کی جانب سے رابطہ نمبرز اور ہیلپ لائنز جاری کی جا چکی ہیں تاکہ ہنگامی صورتحال میں فوری مدد فراہم کی جا سکے۔

ٹیلیفونک رابطہ کے دوران وفاقی وزیر چوہدری سالک حسین نے کہا کہ ایران میں موجود پاکستانی زائرین اور پاکستانی طلباء کی باحفاظت وطن واپسی کو یقینی بنایا جائے، ایران میں ہزاروں سمندر پار پاکستانیز روزگار کیلئے مقیم ہیں۔

چوہدری سالک حسین نے مزید کہا کہ ایران میں مقیم سمندر پار پاکستانیوں کی باحفاظت واپسی کیلئے وزارت اوورسیز پاکستانیز وزارت خارجہ کے ساتھ رابطے میں ہے۔