ڈائریکٹر جنرل انٹر سروسز پبلک ریلیشنز لیفٹیننٹ جنرل احمد شریف چوہدری نے کہا کہ فیلڈ مارشل کی ہدایت پر سیلاب زدہ علاقوں میں امدادی کام کر رہے ہیں۔

وفاقی وزیر اطلاعات عطاء اللہ تارڑ نے ڈی جی آئی ایس پی آر اور چیئرمین این ڈی ایم اے کے ہمراہ مون سون بارشوں اور سیلاب کی صورتحال کے حوالے سے این ڈی ایم اے میں میڈیا کو بریفنگ دی۔

بریفنگ کے دوران ڈی جی آئی ایس پی آر لیفٹیننٹ جنرل احمد شریف نے بتایا کہ اب تک چھ ہزار سے زائد افراد کو امداد فراہم کی گئی ہے، جبکہ آرمی ایوی ایشن بھی امدادی سرگرمیوں میں حصہ لے رہی ہے۔

ڈی جی آئی ایس پی آر کے مطابق میڈیکل بٹالین کے علاوہ سی ایم ایچ سے ڈاکٹرز کی ٹیم کو خیبر پختونخوا روانہ کیا گیا ہے، جہاں فوج کے آٹھ یونٹس امدادی کارروائیوں میں سرگرم عمل ہیں۔

یہ بھی پڑھیں: کراچی میں وقفے وقفے سے موسلادھار بارش کا سلسلہ جاری

لیفٹیننٹ جنرل احمد شریف کے مطابق نو میڈیکل کیمپوں کے ذریعے متاثرین کو طبی امداد فراہم کی جا رہی ہے، چھ ہزار 903 افراد کو ریسکیو کیا گیا، جبکہ بونیر میں دو بٹالین امدادی سرگرمیوں میں مصروف ہیں۔

وزیراعظم کی ہدایت پر متاثرہ علاقوں میں سرگرمیوں کو تیز کیا گیا

وفاقی وزیر اطلاعات عطاء اللہ تارڑ نے سیلاب کی صورتحال کے حوالے سے این ڈی ایم اے میں میڈیا کو بریفنگ دیتے ہوئے کہا کہ اربن فلڈنگ میں انسانی جانوں اور املاک کو نقصان پہنچا، وزیراعظم کی ہدایت پر متاثرہ علاقوں میں سرگرمیوں کو تیز کیا گیا۔

 عطاء اللہ تارڑ نے کہا کہ این ڈے ایم اے پاک فوج اور وفاقی و صوبائی حخومتیں مل کر بہتری حکمت عملی اپنا رہے ہیں، اب تک 25 ہزار افراد کو محفوظ مقامات پر منتقل کیا گیا ہے، سیلابی صورتحال میں بروقت معلومات فراہم کی جا رہی ہیں۔

شمالی علاقہ جات میں گلیشیئر پگھلنے کی وجہ سے سیلابی صورتحال پیدا ہوئی

اس موقع پر چیئرمین این ڈی ایم اے لیفٹیننٹ جنرل انعام حیدر ملک کا کہنا تھا کہ شمالی علاقہ جات میں گلیشیئر پگھلنے کی وجہ سے سیلابی صورتحال پیدا ہوئی، بارشوں اور سیلاب سے 670 افراد جاں بحق اور ایک ہزار افراد زخمی ہوئے۔

چیئرمین این ڈی ایم اے نے بتایا کہ لاپتہ افراد میں سے بیشتر کی لاشیں ملی ہیں، مختلف علاقوں میں کلاوڈ برسٹ کی وجہ سے سیلابی صورتحال پیدا ہوئی، جبکہ آرمی چیف نے متعلقہ اداروں کے ساتھ مل کر امدادی سرگرمیوں کی ہدایت کی۔

لیفٹیننٹ جنرل انعام حیدر ملک کے مطابق 17  اگست سے اب تک 25 ہزار لوگوں کو بچایا گیا، زخمیوں کو اسپتال پہنچایا گیا ہے جنہیں بہترین طبی امداد دی جا رہی ہے، 23  اگست تک بارشوں کا ساتواں سپیل تیز ہوگا، بارشوں کے نئے سپیل کے حوالے سے تیاری مکمل ہے، مختلف ذرائع سے عوام کو معلومات فراہم کی جا رہی ہیں۔

چیئرمین این ڈے ایم اے نے مزید کہا کہ پی ایم راشن پیکیج کے تحت پانچ اضلاع میں امداد کی تیسری کھیپ بھجوائی جا رہی ہے، جس میں ادویات اور راشن بھجوایا جا رہا ہے۔