وانا: سیکیورٹی فورسز نے کیڈٹ کالج وانا پر حملہ کرنے والے تمام خوارج کو کامیاب آپریشن کے دوران ہلاک کر دیا۔

سیکیورٹی ذرائع کے مطابق ایک خودکش حملہ آور سمیت کل 5 دہشت گردوں کو جہنم واصل کیا گیا۔

ذرائع کے مطابق آپریشن کے بعد کالج کی عمارت کو بارودی سرنگوں سے کلیئر کرنے کا عمل جاری ہے جبکہ خوش قسمتی سے کسی کیڈٹ یا استاد کو کوئی نقصان نہیں پہنچا۔

حملے کے وقت کیڈٹ کالج میں تقریباً 650 افراد موجود تھے جن میں 525 کیڈٹس شامل تھے، تاہم سیکیورٹی فورسز نے طلبہ کی جانوں کی حفاظت کے لیے نہایت احتیاط اور حکمتِ عملی سے کارروائی کی۔

ابتدائی تحقیقات کے مطابق دہشت گردوں نے گزشتہ روز کالج کے مرکزی گیٹ پر بارود سے بھری گاڑی سے دھماکا کیا، جس سے گیٹ تباہ اور قریبی عمارتوں کو نقصان پہنچا۔

ذرائع کا کہنا ہے کہ حملہ آوروں کا تعلق افغانستان سے تھا اور وہ دورانِ کارروائی ٹیلی فون کے ذریعے بیرونِ ملک سے ہدایات حاصل کررہے تھے۔