اسلام آباد: واشنگٹن میں افغان شہری کی فائرنگ پر پاکستان کا ردعمل سامنے آگیا ہے۔
ترجمان دفتر خارجہ نے اپنے جاری کردہ بیان میں کہا کہ پاکستان واشنگٹن ڈی سی میں افغان شہری کی فائرنگ کے واقعے کی سخت مذمت کرتا ہے۔
انہوں نے کہا کہ دلی ہمدردیاں ہلاک ہونے والے امریکی فوجی کے ساتھ ہیں، زخمیوں کی جلد اور مکمل صحت یابی کے لیے دعاگو ہیں، متاثرہ خاندانوں، امریکی حکومت اور عوام سے بھی گہرے دکھ اور افسوس کا اظہار کرتے ہیں۔
پاکستان کی جانب سے کہا گیا کہ مخصوص ہدف پر حملہ بلاشبہ امریکی سرزمین پر دہشتگردی کی سنگین واردات ہے، گزشتہ دو دہائیوں کے دوران پاکستان نے اسی نوعیت کے بے شمار دہشت گرد حملوں کا سامنا کیا، پاکستان نے جن حملوں کا سامنا کیا ان کے روابط واضح طور پر افغانستان سے ملتے رہے ہیں۔
مزید پڑھیں: وائٹ ہاؤس کے قریب فائرنگ، دو نیشنل گارڈ شدید زخمی، مشتبہ افغان حملہ آور گرفتار
ترجمان دفتر خارجہ کا کہنا تھا کہ واشنگٹن میں فائرنگ سرحد پار دہشت گردی کے پھیلتے ہوئے خطرے اور عالمی تعاون کی ناگزیر ضرورت کو اجاگر کرتی ہے، واشنگٹن میں فائرنگ عالمی سطح پر دہشت گردی کی نئی لہر کی جانب اشارہ ہے۔
انہوں نے مزید کہا کہ عالمی برادری کو صورتحال کا سنجیدہ نوٹس لینا چاہیے، عالمی برادری انسدادِ دہشت گردی کے لیے مشترکہ کوششوں کو ازسرِنو متحرک کرے، پاکستان، امریکا اور بین الاقوامی برادری کے ساتھ مل کر مشترکہ چیلنج سے نمٹنے کے لیے پُرعزم ہے۔