راولپنڈی: امن و امان کی موجودہ صورتحال کے پیش نظر اڈیالہ جیل کی بیرونی سیکیورٹی ہائی الرٹ کر دی گئی ہے۔
جیل کے اطراف میں پولیس کی تعیناتی میں سختی برتی گئی ہے اور خصوصی سیکیورٹی پلان نافذ العمل کیا گیا ہے، جو غیر معینہ مدت تک جاری رہے گا۔
جیل کی حفاظت کے لیے 12 تھانوں کے ایس ایچ اوز، خواتین پولیس افسران اور اہلکار، آر ایم پی فورس، پنجاب کانسٹیبلری سمیت مجموعی طور پر 700 افسران اور اہلکار تعینات کیے گئے ہیں۔
جیل کے داخلی اور خارجی راستوں پر پانچ اہم چیک پوسٹس پر بھاری نفری موجود ہوگی، جن میں ناکہ داہگل، گیٹ ون، گیٹ فائیو، فیکٹری ناکہ اور گورکھ پور شامل ہیں جبکہ پولیس اہلکاروں کی ڈیوٹی 12 گھنٹے کی دو شفٹوں میں تقسیم کی گئی ہے۔
مزید پڑھیں: اڈیالہ جیل کے باہر صحافیوں پر تشدد، مقدمے میں انسداد دہشت گردی کی دفعات شامل
اس کے علاوہ اہلکار ربڑ کی گولیاں، ٹیئر گیس، شیلڈز اور اینٹی رائٹ کے دیگر حفاظتی آلات سے لیس ہوں گے۔ ٹریفک پولیس کے 10 افسران اور اہلکار بھی تعینات ہیں اور لفٹر بھی موجود ہوگا۔
قیدیوں کی منتقلی کے لیے وینز دستیاب رہیں گی جبکہ اڈیالہ جیل کی گاڑی کی نفری کچہری ڈیوٹی کے بعد اسٹینڈ بائی ہوگی۔ پولیس اہلکاروں کی ڈیوٹی کی براہِ راست نگرانی ایس پی صدر انعم شیر کریں گی۔