پشاور میں فیڈرل ہیڈکوارٹر پر ہونے والے خودکش دھماکے کے بعد وفاقی وزیرِ داخلہ محسن نقوی فیڈرل کانسٹیبلری کے افسران و جوانوں سے ملاقات کے لیے ایف سی ہیڈکوارٹر پہنچے۔
وزیرِ داخلہ نے یادگارِ شہداء پر حاضری دی، پھول چڑھائے اور شہداء کے درجات کی بلندی کے لیے دعا کی۔
محسن نقوی نے حملے کی جگہ کا معائنہ کیا اور واقعے سے متعلق بریفنگ لی۔ انہیں فتنۂ خوارج کے حملے کو ناکام بنانے کے لیے فیڈرل کانسٹیبلری کے جوانوں کی کارروائی سے آگاہ کیا گیا۔
وزیرِ داخلہ نے بہادری کا مظاہرہ کرنے والے جوانوں کی جرات کو خراجِ تحسین پیش کرتے ہوئے کہا کہ ایف سی کانسٹیبلز نے جوانمردی کی بےمثال مثال قائم کی اور تین خودکش بمباروں کو صرف تین منٹ میں جہنم واصل کر دیا۔
انہوں نے جامِ شہادت نوش کرنے والے تینوں جوانوں کی عظیم قربانی کو سلام پیش کرتے ہوئے کہا کہ ان کی قربانی رائیگاں نہیں جائے گی، اور حکومت شہداء کے خاندانوں کا اپنے خاندان کی طرح خیال رکھے گی۔
محسن نقوی کا کہنا تھا کہ جس دلیری سے آپ نے بھارتی سپانسرڈ دہشتگردوں کا مقابلہ کیا وہ قابلِ تحسین ہے۔
دورے کے موقع پر آئی جی خیبرپختونخوا پولیس ذوالفقار حمید، کمانڈنٹ فیڈرل کانسٹیبلری نذیر گاڑا اور دیگر اعلیٰ افسران بھی موجود تھے۔
