بین الاقوامی یومِ یکجہتیِ فلسطین کے موقع پر صدرِ پاکستان آصف علی زرداری نے مظلوم فلسطینی عوام کی جدوجہد، ثابت قدمی اور عظیم قربانیوں کو زبردست خراجِ تحسین پیش کیا۔
اپنے پیغام میں صدر مملکت نے کہا کہ فلسطینی عوام نے بے مثال ہمت اور جرات کے ساتھ ظلم و بربریت کا ڈٹ کر مقابلہ کیا ہے، اور عالمی برادری پر ذمہ داری عائد ہوتی ہے کہ وہ ان کے بنیادی انسانی حقوق کے تحفظ کے لیے عملی کردار ادا کرے۔
صدر زرداری نے واضح کیا کہ پاکستان ہمیشہ کی طرح آج بھی فلسطینیوں کے حقِ آزادی، سلامتی اور خود ارادیت کے لیے ہر عالمی فورم پر آواز بلند کرتا رہے گا۔
انہوں نے غزہ میں جاری انسانی بحران پر شدید تشویش کا اظہار کرتے ہوئے فوری جنگ بندی اور امدادی راستے کھولنے کا مطالبہ کیا۔
صدر نے عالمی طاقتوں کو مخاطب کرتے ہوئے کہا کہ مظلوم فلسطینیوں کے خلاف جاری جارحیت کو روکنے میں تاخیر انسانیت کے خلاف جرم ہے۔
انہوں نے کہا کہ فلسطینی بچوں، خواتین اور نہتے شہریوں پر مسلسل ڈھائے جانے والے مظالم نے عالمی ضمیر کو جھنجھوڑ کر رکھ دیا ہے، اس لیے اب جنگ بندی اور امن کی بحالی ناگزیر ہو چکی ہے۔
اپنے پیغام میں صدر زرداری نے فلسطینی عوام کے حقِ خود ارادیت کی بھرپور حمایت کا اعادہ کرتے ہوئے کہا کہ دنیا کو فلسطینیوں کی جائز جدوجہد کو تسلیم کرنا ہوگا۔
انہوں نے کہا کہ فلسطین کے دیرینہ مسئلے کا منصفانہ اور پائیدار حل خطے میں مستقل امن کے لیے ناگزیر ہے۔