وزیراعظم شہباز شریف نے کہا کہ فلسطینیوں کے خلاف اسرائیلی جنگی جرائم کا عالمی سطح پر احتساب لازمی ہے۔
وزیراعظم شہباز شریف نے عالمی یوم یکجہتی فلسطین پر پیغام دیتے ہوئے کہا کہ غزہ میں 70 ہزار سے زائد شہادتیں انسانیت کا المیہ ہے، غزہ کے گھر، اسپتال، اسکول اور بنیادی ڈھانچے ملبے کا ڈھیر بن چکے ہیں۔
انہوں نے کہا کہ فلسطینی عوام نے ظلم کے باوجود غیر متزلزل ہمت کا مظاہرہ کیا، فلسطینیوں کے خلاف اسرائیلی جنگی جرائم کا عالمی سطح پر احتساب لازمی ہے، دو ریاستی حل اور غزہ امن منصوبہ مسئلہ حل کرنے کا ایک موقع ہے۔
یہ بھی پڑھیں: بین الاقوامی یومِ یکجہتیِ فلسطین، صدر آصف علی زرداری کا بہادر فلسطینی عوام کو سلام
شہباز شریف کا کہنا تھا کہ جنگ بندی برقرار رہنی چاہیے، اسرائیلی تشدد کا فوری خاتمہ ضروری ہے، غزہ میں انسانی امداد کی بلاتعطل فراہمی یقینی بنانا ناگزیر ہے، یو این آر ڈبلیو اے کو سیاسی مداخلت کے بغیر مکمل طور پر فعال ہونا چاہیے۔
انہوں نے کہا کہ اسرائیل کا فلسطینی سرزمین بشمول غزہ سے مکمل انخلا ضروری ہے، دنیا کو مغربی کنارے کی سنگین صورتحال پر بھی توجہ دینی چاہیے، غیرقانونی بستیاں عالمی قوانین کی کھلی خلاف ورزی، امن کےلیے رکاوٹ ہیں۔
وزیراعظم نے مزید کہاکہ پاکستان فلسطین کےلیے منصفانہ، جامع دیرپا حل، حق خود ارادیت، آزاد ریاست کے قیام کی بھرپور حمایت کرتا ہے، ساتھ ہی فلسطینی عوام کی جائز مزاحمت، ان کی جدوجہد آزادی کی بھی مکمل حمایت کرتے ہیں۔