راولپنڈی: سیکیورٹی فورسز نے شمالی وزیرستان میں دو کارروائیوں کے دوران 7 خارجی دہشت گردوں کو ہلاک کردیا۔
پاک فوج کے شعبہ تعلقات عامہ (آئی ایس پی آر) کے مطابق شمالی وزیرستان کے علاقوں میر علی اور اسپن وام میں سیکیورٹی فورسز نے دو انٹیلیجنس بیسڈ آپریشنز انجام دیے جس دوران 7 خارجی دہشت گرد ہلاک ہوئے۔
آئی ایس پی آر کا کہنا ہے کہ میر علی میں گذشتہ روز سیکیورٹی فورسز کو خارجی دہشت گردوں کی موجودگی کی اطلاع ملی جس پر فورسز نے موثر کارروائی کرتے ہوئے دہشت گردوں کے ٹھکانے کو نشانہ بنایا۔
اس دوران سیکیورٹی فورسز اور دہشت گردوں کے درمیان شدید فائرنگ کا تبادلہ ہوا جس میں 6 خارجی دہشت گرد مارے گئے۔
اسی طرح شمالی وزیرستان کے علاقے اسپن وام میں بھی سیکیورٹی فورسز نے انٹیلیجنس بیسڈ آپریشن کیا جس میں 1 خارجی دہشت گرد ہلاک ہوا۔ دونوں علاقوں میں ہلاک شدگان سے بھاری مقدار میں ہتھیار اور گولہ بارود بھی برآمد کیا گیا۔
ہلاک شدہ دہشت گرد سیکورٹی فورسز، قانون نافذ کرنے والے اداروں کے اہلکاروں اور شہریوں پر حملوں اور ٹارگٹ کلنگ میں ملوث تھے۔
آئی ایس پی آر نے مزید بتایا کہ میر علی اور اسپن وام میں بھارتی اسپانسرڈ دہشت گردوں کے خاتمے کے لیے سینیٹائزیشن آپریشنز جاری ہے۔