چیئرمین پاکستان کرکٹ بورڈ احسان مانی نے کہا ہے کہ ٹیم چاہے کوئی بھی ہو لیکن کھلاڑیوں کی سیکورٹی پر کوئی سمجھوتہ نہیں ہوگا۔

تفصیلات کے مطابق چیئرمین پی سی بی احسان مانی نے کراچی میں سری لنکن وفد کے ساتھ پریس کانفرنس کرتے ہوئے کہا ہے کہ سری لنکا کا شکر گزار ہوں جنہوں نے پاکستان میں کرکٹ کی بحالی میں کردار ادا کیا ہے۔

احسان مانی کا کہنا تھا کہ سری لنکن ٹیم کی پاکستان آمد سے دنیا بھر کی ٹیموں کی آمد کا آغاز ہوگا۔

چیئرمین کا کہنا تھا دہشت گردی کے واقعات تو نیوزی لینڈ میں بھی ہو چکے ہیں، مقصد سیکورٹی کے فول پروف انتظامات کرنا ہوتے ہیں، سری لنکن بورڈ کی سیکورٹی ٹیم پہلے ہی انتظامات سے مطمئن ہے۔

دوسری جانب سری لنکا کے وزیر کھیل ہیرن فرنیڈو نے بھی کہا کہ پاکستان کا شکریہ ادا کرتے ہیں حملے کے بعد اپنی انڈر نائنٹین ٹیم بھیج کر ہم پر اعتماد کیا ہے۔

انہوں نے کہا کہ اس بار پاکستان میں سیکورٹی کی انتظامات زبردست ہیں اور سیکوڑٹی اتنی سخت ہے کہ میں بھی باہر نہیں جاسکتا ہوں۔

ہیرن فرنیڈو نے کہا کہ ایشیا کی دو اہم ٹیمز سری لنکا اور بنگلہ دیش پاکستان آنے کے کیے تیار ہیں تو ایشیا کپ پاکستان میں ہونا چاہیے۔

صدر سری لنکن کرکٹ بورڈ شامی ڈسلوا نے کہا کہ پاکستان میں پہلے صرف تین ٹی ٹوئنٹی کھیلنے کا فیصلہ کیا تھا بعد میں تین ون ڈے کھیلنے کا بھی فیصلہ کیا ہے۔

انکا مزید کہنا تھا کہ اگلے سال ایشیاء کپ پاکستان میں ہے جس کے انعقاد میں ہم مدد کریں گے کیونکہ اب دورہ پاکستان کے حوالے سے کوئی مسلہ نہیں ہے۔

چیئرمین پی سی بی نے کہا کہ سری لنکا کے بعد اب پاکستان دورہ کے لئے کرکٹ آسڑیلیا سے رابطے میں ہیں جبکہ نیوزی لینڈ بورڈ سے بھی پاکستان دورے سے متعلق رابطہ ہوا ہے اور ائیرلینڈ کرکٹ بورڈ نے بھی دورے کے لیے ہم سے رابطہ کیا ہے۔