پاکستان اور آسٹریلیا کے درمیان کھیلے جانے والے دوسرے ٹیسٹ میچ کا دوسراروز  بھی آسٹریلوی بلے بازوں کے نام رہا۔

تفصیلات کے مطابق ایڈیلیڈ میں جاری دوسرے ٹیسٹ میچ کے دوسرے روز آسٹریلیا نے 302 رنز سے اپنی نامکمل اننگز کا آغاز کیا تو مارنس لبوشین انفرادی اسکور میں صرف دو رنز کے اضافے کے بعد شاہین شاہ آفریدی کی گیند پر بولڈ ہو گئے۔

اس کے بعد اسٹیون اسمتھ بھی 36 رنز بنا کر شاہین  شاہ آفریدی کا شکار بن گئے۔

تاہم ڈیوڈ وارنر نے شاندار بلے بازی کا سلسلہ جاری رکھا اور اپنی ٹرپل سنچری مکمل کی، وہ 335 رنز بنا کر ناٹ آؤٹ رہے، میتھیو ویڈ نے بھی 38 رنز اسکور کیےاور  ناٹ آؤٹ رہے۔

آسٹریلیا نے اپنی پہلی اننگز  589 رنز تین کھلاڑی آؤٹ پر ڈکلیئر کر دی۔

یاد رہے کہ آسٹریلیا نے ٹاس جیت کر پہلے بیٹنگ کا فیصلہ کیا تو آغاز میں ہی اسے  جو برنز کی صورت میں نقصان کا سامنا کرنا پڑا تھا۔جو برنز آٹھ کے مجموعی اسکور پر چار رنزبناکر شاہین شاہ آفریدی کا شکار بنے تھے۔

تاہم اوپنر ڈیوڈ وارنر اور مارنس لبوشین نے شاندار بیٹنگ کا مظاہرہ کرتے ہوئے لگاتاردوسری سنچریز اسکور کیں اور  دن کے اختتام تک ٹیم کا اسکور ایک وکٹ کے نقصان پر 302 تک پہنچادیا تھا۔

واضح رہے کہ دوسرے ٹیسٹ کے لیے قومی ٹیم میں 3 تبدیلیاں کی گئی ہیں، حارث سہیل، عمران خان سینئر اور نسیم شاہ کی جگہ امام الحق، محمد عباس اور ڈیبیوٹینٹ محمد موسیٰ کو ٹیم میں شامل کیا گیا ہے ۔

2 ٹیسٹ میچزکی سیریز میں آسٹریلیا کو 0-1 کی برتری حاصل ہے، پہلے ٹیسٹ میچ میں آسٹریلیا نے قومی ٹیم کو اننگز اور 5 رنز سے شکست دی تھی۔