پاکستان اور انگلینڈ   کے درمیان جاری ویمنز ٹی ٹوئنٹی کے  پہلے میچ میں  انگلینڈ نے پاکستان کو 29 رنز سے شکست دے دی۔

ملایئشیاکے کنرارا اوول میں کھیلے گئے ویمنز ٹی ٹوئنٹی میچ میں پاکستان نے ٹاس جیت کر پہلے بالنگ کا فیصلہ کیا  تو انگلینڈ نے ایمی جونز  کی نصف سنچری کی بدولت مقررہ  20 اوورز میں 4 وکٹوں کے نقصان پر 154 رنز بنائے۔

ایمی جونز نے 53 رنز  کی شاندار اننگز کھیلی۔ ان کے علاوہ ٹیمی بیماؤنٹ نے30، کیتھرین برنٹ نے 18 اور ڈینی ویاٹ نے 6 رنز بنائے۔

نتالی اسکیور 34 اور کپتان ہیتھر نائٹ 13 رنز بناکر ناقابل شکست رہیں۔

پاکستان کی جانب سے ندا ڈار نے 2 جبکہ انعم امین اور ڈیبیوٹینٹ  سیدہ عروب شاہ نے ایک ایک وکٹ حاصل کی ۔

155 رنز کے تعاقب میں پاکستان ٹیم آغاز سے ہی مشکلات کا شکار رہی اور دونوں اوپنرز ناہیدہ خان اور جویریہ خان بغیر کھاتہ کھولے ہی پویلین واپس لوٹ گئیں۔

کپتان بسمہ معروف کے ہمراہ عمیمہ سہیل نے ٹیم کو کچھ سنبھالا مگر 47 کے مجموعی اسکور پر وہ 21 رنز بناکرآؤٹ ہوگئیں جس کے بعد وکٹیں یکے بعد دیگرے گرتی رہیں۔

پاکستان کی پوری ٹیم 19 ویں اوور میں 125 رنز بناکر آل آؤٹ ہوگئی۔بسمہ معروف 60 رنز بناکر سب سے نمایاں رہیں۔ سدرہ نواز 22 رنز بناسکیں ۔

دیگر بلے بازوں میں عالیہ ریاض 5 ،ارم جاوید ایک ، جبکہ ندا ڈار، ڈیانا بیگ اور سیدہ عروب شاہ کوئی رن نہ بناسکیں ۔

انگلینڈ کی جانب سے صوفی ایکلی اسٹون نے 3، نتالی اسکیور اور فریاڈیویس نے 2،2 جبکہ سارہ گلین اور انایا شربسول نے ایک ایک وکٹ حاصل کی۔

پاکستان کی جانب سے سیدہ عروب شاہ جبکہ انگلش ٹیم کی سارہ گلین  نے ٹی ٹوئنٹی ڈیبیو کیا۔

اس فتح کے ساتھ انگلینڈ نے  تین میچز کی سیریز میں 0-1کی برتری حاصل کرلی ہے۔

واضح رہے کہ سیریز کا  دوسرا ٹی ٹوئنٹی میچ 19 دسمبر کو  جبکہ تیسرا میچ 20 دسمبر کو کنرارا اوول میں ہی کھیلا جائے گا۔

یاد رہے  کہ انگلش ٹیم اس سے قبل ایک روزہ میچوں کی سیریز 0-2 سے اپنے نام کر چکی ہے۔