پاکستان کرکٹ بورڈ  نے بنگلہ دیش  کرکٹ بورڈ کو دورہ پاکستان میں ڈے اینڈ نائٹ  ٹیسٹ کھیلنے کی پیشکش کی ہے۔

تفصیلات کے مطابق  بنگلہ دیشی کرکٹ ٹیم نے 2020 میں پاکستان کا دورہ کرنا ہے  جس میں پاکستان کرکٹ بورڈ کراچی میں ڈے اینڈ نائٹ ٹیسٹ کھیلنے کا خواہاں ہے۔

اس حوالے سے چیئرمین پی سی بی احسان مانی نے کہا کہ کئی ملکوں میں ڈے اینڈ نائٹ ٹیسٹ مقابلوں کو پذیرائی حاصل ہورہی ہے، ہمارا ارادہ ہے کہ ہوم سیریز میں کم از کم ایک ٹیسٹ ڈے اینڈ نائٹ ہو۔

انہوں نے کہا کہ تماشائیوں کی خاصی تعداد کے علاوہ ڈے اینڈ نائٹ ٹیسٹ کا فائدہ یہ ہے کہ ہمیں اپنے کرکٹ سیزن کو طول دینے کا ایک موقع میسر ہوگا۔

چیئر مین پی سی بی کا کہنا تھا کہ جن مہینوں میں دن کے وقت تھوڑی گرمی ہوتی ہے، ان کے دوران رات کو موسم بہتر ہوجاتا ہے اور ڈے اینڈ نائٹ میچ کھیلے جاسکتے ہیں۔

ان کا کہنا تھا کہ پاکستان میں اگر سیزن اپریل کے وسط یا اوائل میں ختم ہوتا ہے تو ہم اس کو ڈے اینڈ نائٹ میچوں کے ذریعے توسیع دے سکتے ہیں۔

احسان مانی نے کہا کہ خالی میدانوں میں ٹیسٹ کرکٹ کھیلنا مناسب نہیں ہے اور اس خیال کے ساتھ ہمیں امید ہے کہ تماشائی شام کو اپنے کام سے واپسی پر اس منفرد تجربے سے فائدہ اٹھائیں گے۔

واضح رہے کہ بنگلہ دیش اور پاکستان کے درمیان جنوری 2020 میں دو ٹیسٹ اور تین ٹی ٹوئنٹی میچزکی سیریز شیڈول ہے تاہم بنگلہ دیش کرکٹ بورڈ تاحال اس سیریز پر  کوئی حتمی فیصلہ نہیں کرسکا ہے۔

یادرہے کہ پاکستان میں دس برس بعد رواں ماہ ٹیسٹ کرکٹ بحال ہورہی ہے ۔سری لنکا کی ٹیم دو ٹیسٹ  میچز کی سیریز کے لیے اسلام آباد پہنچ گئی ہے۔